25-vjeçari në gjendje të rënduar, autori në kërkim

Një ngjarje e rëndë është shënuar këtë të diel në qytetin e Vlorës, ku një 25-vjeçar, shtetasi M. Shaka, është plagosur rëndë me thikë gjatë orarit të punës në një berberhane. Ngjarja ka ndodhur në zonën e njohur si Aleksandria, në lagjen Pavarësia.

Sipas burimeve zyrtare, i riu ka mbërritur në spital me plagë të thellë me thikë pranë zemrës. Mjekët bëjnë me dije se 25-vjeçari ka qenë në gjendje të koshientë, ndërsa aktualisht ndodhet në sallën e ndërhyrjeve për ekzaminimet dhe trajtimin e nevojshëm.

Nga informacionet paraprake të Policisë së Vlorës, mësohet se sherri ka nisur pas një konflikti verbal mes një klienti dhe kursantit të berberhanes, ku i plagosuri ishte duke punuar. Pas debatit, klienti ka goditur me thikë kursantin dhe është larguar me shpejtësi nga vendngjarja.

Efektivët e policisë kanë rrethuar zonën dhe po ushtrojnë kontroll në ambientet e biznesit, ndërkohë që autori është identifikuar dhe ndodhet në kërkim. Hetimet për zbardhjen e plotë të ngjarjes vijojnë.