Pogradec, masakroi me thikë fqinjin në derë të shtëpisë, arrestohet Fatmir Manellari

Fatmir Manellari është vendosur në pranga rreth 1 muaj e gjysmë pas krimit të rëndë në fshatin Gështenjas, ku masakroi me thikë fqinjin e tij Safet Hyskollari.

63-vjeçari ndodhej në arrati prej datës 7 shtator dhe sipas bluve të Pogradecit “specialistët për Hetimin e Krimeve të Komisariatit të Policisë mbështetur me inteligjencë operative, si dhe falë veprimeve të mirorganizuara në kuadër të operacionit “Lokalizimi”, kapën dhe ndaluan autorin e dyshuar Fatmir Manellari, pasi gjatë një konflikti për motive të dobëta, ka vrarë me thikë, 65 vjeçarin Safet Hyskollari dhe më pas është larguar nga vendngjarja”.

Autori i dyshuar akuzohet për “Vrasja me dashje” dhe “Prodhimi, mbajtja, blerja apo shitja pa leje e armëve të ftohta”.

Njoftimi

Pogradec/Finalizohet operacioni policor i koduar “Lokalizimi”.

Lokalizohet, kapet dhe vihet në pranga autori i dyshuar i ngjarjes së ndodhur më datë 07.09.2022, në fshatin Gështenjas, ku mbeti i vrarë me mjet prerës (thikë), një 65-vjeçar.

Specialistët për Hetimin e Krimeve të Komisariatit të Policisë Pogradec, në vijim të punës për dokumentimin e plotë të ngjarjes së ndodhur më datë 07.09.2022, në fshatin Gështenjas, Pogradec, ku mbeti i vrarë me mjet prerës (thikë) shtetasi S. H., mbështetur me inteligjencë operative, si dhe falë veprimeve të mirorganizuara në kuadër të operacionit “Lokalizimi”, kapën dhe ndaluan autorin e dyshuar, të shpallur në kërkim në lidhje me këtë ngjarje, shtetasin:

– F. M., 63 vjeç, banues në fshatin Gështenjas, Pogradec, pasi gjatë një konflikti për motive të dobëta, ka vrarë me mjet prerës (thikë), shtetasin S. H., 65 vjeç dhe më pas është larguar nga vendngjarja.

Materialet i kaluan Prokurorisë pranë Gjykatës së Shkallës së Parë Pogradec, për veprat penale “Vrasja me dashje” dhe “Prodhimi, mbajtja, blerja apo shitja pa leje e armëve të ftohta”.