Policia e Shtetit: Kemi nisur hetim për zbardhjen e plotë të ngjarjes ku mbeti i vrarë Klodian Rasha

Policia e Shtetit ka dalë me një reagim zyrtar për ngjarjen e një dite më parë ku mbeti i vrarë i riu Klodian Rasha.

Në reagimin e publikuar në rrjetin social Facebook thuhej se të gjithë janë të prekur nga kjo ngjarje dhe se Policia e Shtetit po punon intensivisht dhe ka nisur një hetim për të zbuluar të gjitha rrethanat dhe faktorët e tjerë që çuan në incidentin fatal.

Reagimi i plotë:
Në emër të punonjësve të Policisë së Shtetit, të prekur nga ngjarja e rëndë që ndodhi një ditë më parë në Tiranë, e cila përfundoi me vrasjen tragjike të të riut Klodjan Rasha, i shprehim ngushëllimet më të sinqerta familjarëve, miqve, të afërmve dhe qytetarëve të lënduar nga ky akt.

Pas ngjarjes së ndodhur, krahas hetimeve të nisura nga organet e pavarura, për zbardhjen e plotë të rrethanave të ngjarjes, strukturat përgjegjëse në Policinë e Shtetit po analizojnë në mënyrë intensive të gjithë shkaqet, veprimet, mosveprimet apo faktorë të tjerë që çuan në incidentin fatal.

Policia e Shtetit garanton qytetarët se mbetet e përkushtuar dhe e angazhuar në detyrën e saj për rritjen e sigurisë publike, në mbrojtje të jetës dhe të drejtave të çdo qytetari.