Politikani pro-rus i bën thirrje Putinit dhe Zelensky-t: Më shkëmbeni me ushtarët dhe qytetarët e bllokuar në Mariupol

Shërbimi i Sigurisë së Ukrainës publikoi një video të hënë ku shfaqet një politikan pro-rus, Viktor Medvedchuk, i cili u arrestua disa ditë më parë, duke i bërë thirrje Presidentëve Putin dhe Zelensky që ai të shkëmbehet me ushtarë dhe qytetarë ukrainas që kanë mbetur të bllokuar në Mariupol.

“Unë, Medvedchuk Viktor Vladimirovich, dëshiroj t’i drejtohem Presidentit të Federatës Ruse, Vladimir Putin dhe Presidentit të Ukrainës, Vladimir Zelensky, me një lutje për palën ukrainase që të më shkëmbejë me ushtarët dhe qytetarët në Mariupol që kanë mbetur të bllokuar atje dhe nuk kanë mundësi për një evakuim të sigurt përmes një korridori humanitar”, tha Medvedchuk në apelin e tij.

Zelensky njoftoi javën e kaluar se Medvedchuk ishte arrestuar në një “operacion special”.

Është e paqartë nëse Medvedchuk, i cili është përballur me akuza për tradhti në Ukrainë, po fliste kundër vullnetit të tij dhe ku e regjistroi videon.

Gruaja e tij, Oksana Marchenko, ka postuar video duke apeluar për lirimin e bashkëshortit të saj në këmbim të shtetasve britanikë të zënë rob nga forcat ruse në Mariupol.