Prokuroria kërkon burg për 3 protestues, detyrim paraqitje për të tjerët

Gjykata e Tiranës ka nisur shqyrtimin e masave të sigurisë për 21 personat e ndaluar pas incidenteve të regjistruara gjatë protestës së fundit pranë Parlamentit. Seanca po zhvillohet në praninë e të arrestuarve, avokatëve të tyre mbrojtës, si dhe përfaqësuesve të organit të akuzës.

Gjatë procesit gjyqësor, Prokuroria ka kërkuar caktimin e masës “arrest në burg” për tre prej të ndaluarve, të cilët dyshohet se kanë ushtruar dhunë duke goditur një automjet të Policisë së Shtetit gjatë përplasjeve.

Ndërkohë, për 18 personat e tjerë, Prokuroria ka propozuar një masë më të lehtë sigurie, konkretisht “detyrim paraqitje”, duke vlerësuar rrethanat dhe rolin e tyre në ngjarje.

Seanca vijon ende dhe pritet që në orët në vijim Gjykata e Tiranës të shpallë vendimet përkatëse për secilin nga të arrestuarit, pasi të shqyrtojë kërkesat e Prokurorisë dhe pretendimet e paraqitura nga mbrojtja.