Punësimi i Muçi Shaljanit, Prokuroria dërgon në gjyq ish-drejtorët e AMP

Prokuroria e Tiranës ka mbyllur hetimet dhe ka dërguar për gjykim dy ish-drejtues të Autoritetit të Mbikëqyrjes Policore (AMP), të akuzuar për “shpërdorim detyre”, në lidhje me punësimin e paligjshëm të Muçi Shalijanit, i njohur si “Sheqeri”, i cili mbeti i vrarë në Rinas.

Sipas dosjes hetimore, Shalijani humbi jetën më 11 nëntor të vitit të kaluar, në zonën e rrethrrotullimit të Rinasit, pranë aeroportit “Nënë Tereza”, së bashku me Gilmando Danin. Hetimet zbuluan se ai ishte punësuar në mënyrë të jashtëligjshme si punonjës i AMP-së.

Në përfundim të procedimit penal nr. 8566 të vitit 2025, Prokuroria ka ngritur akuza ndaj shtetasve A.S., ish-Drejtor i Përgjithshëm i AMP-së, dhe G.S., Drejtor i Financës dhe Shërbimeve Mbështetëse, për shkelje të nenit 248 të Kodit Penal.

Sipas organit të akuzës, punësimi i Shalijanit është kryer në kundërshtim të plotë me ligjin nr. 128/2021 “Për Agjencinë e Mbikëqyrjes Policore” dhe rregulloren përkatëse për funksionimin e këtij institucioni. Procedurat ligjore, si shpallja e vendit vakant, ngritja e komisionit të vlerësimit, testimet dhe verifikimet përfundimtare, nuk janë zbatuar në asnjë fazë.

Nga hetimet rezulton se dokumentacioni për punësimin është përgatitur nga G.S., ndërsa vendimmarrja është marrë nga drejtori i përgjithshëm i komanduar në atë kohë, A.S. Dy zyrtarët dyshohet se kanë bashkëpunuar për të anashkaluar procedurat ligjore, duke justifikuar punësimin me argumentin e “nevojave emergjente”, të cilat nuk rezultojnë të jenë kërkuar apo dokumentuar nga asnjë strukturë e AMP-së.

Një tjetër element i rëndësishëm është fakti se i ndjeri është punësuar brenda një kohe shumë të shkurtër, vetëm katër ditë nga paraqitja e kërkesës deri në lidhjen e marrëdhënies financiare. Gjatë kësaj periudhe dhe deri në ditën e ngjarjes, ai rezulton të jetë paguar rregullisht, pa u paraqitur asnjëherë në vendin e punës dhe pa kryer asnjë detyrë.

Prokuroria thekson se të pandehurit kanë qenë të vetëdijshëm për shkeljet dhe mungesën e kushteve ligjore, por megjithatë kanë vijuar procedurën, duke futur në strukturë një person pa verifikim real dhe me dokumentacion të dyshimtë.