Raketa izraelite mbi rebelët Houthi në Jemen

Izraeli tha se ka kryer sulme ajrore në Jemen, duke goditur një kompleks ushtarak ku ndodhet edhe pallati presidencial, në përgjigje të sulmeve me raketa të rebelëve Huthi.

Forcat Mbrojtëse të Izraelit (IDF) thanë në një deklaratë për X se goditën disa objektiva në kryeqytetin Sanaa të dielën, duke përfshirë “një vendndodhje ushtarake ku ndodhet pallati presidencial, termocentralet Adar dhe Hizaz, si dhe një vendndodhje për ruajtjen e karburantit”.

Të paktën gjashtë persona u vranë dhe 86 të tjerë u plagosën në sulmet ajrore, raportoi Reuters, duke cituar autoritetet shëndetësore të rebelëve Huthi. Grupi i mbështetur nga Irani kontrollon pjesën më të madhe të Jemenit perëndimor, përfshirë kryeqytetin.

Që kur filloi lufta në Gaza gati dy vjet më parë, Huthitët kanë lëshuar raketa balistike dhe dronë drejt Izraelit dhe kanë sulmuar anije në Detin e Kuq, duke pretenduar se po veprojnë në mbështetje të palestinezëve.

Sulmi i fundit me raketa ndodhi të premten, kur Huthitët thanë se qëlluan një lloj të ri predhe në Aeroportin Ben Gurion. Sipas IDF-së, ajo u nda në ajër pas disa përpjekjeve për përgjim.

Një zyrtar i Forcave Ajrore Izraelite, i cili nuk u identifikua, i tha Associated Press se ishte një municion thërrmues i projektuar për të shpërndarë eksplozivë të shumtë në momentin e përplasjes, duke e bërë më të vështirë interceptimin. Ai tha se më shumë se dhjetë avionë luftarakë morën pjesë në bastisjet e së dielës.