Raketa ukrainase vret 15 persona në një bllok apartamentesh në Rusi

Të paktën 15 persona u vranë dhe dhjetëra të tjerë u plagosën të dielën kur një pjesë e një blloku apartamentesh rus u shemb pasi u godit nga fragmente të një rakete të epokës sovjetike, të lëshuar nga Ukraina dhe të rrëzuar nga Rusia.

Në një nga sulmet më vdekjeprurëse deri më tani në rajonin e Belgorodit, Ukraina nisi atë që zyrtarët rusë thanë se ishte një sulm masiv me raketa, duke përfshirë raketat balistike Tochka dhe sistemet lëshuese Adler dhe RM-70 Vampire (MLRS).

Ministria ruse e emergjencave tha herët të hënën se 15 persona humbën jetën kur ndërtesa u shemb. Vyacheslav Gladkov, guvernatori i rajonit, tha se katër persona të tjerë vdiqën të dielën në sulme të veçanta nga Kievi.

Njëzet e shtatë persona u plagosën të dielën në sulme të ndryshme, tha Gladkov në aplikacionin e mesazheve Telegram. Ministria ruse e mbrojtjes tha se të paktën 12 raketa ishin përfshirë në sulmet në Belgorod, të cilat i quajti një “sulm terrorist në zonat e banuara”.

“Fragmentet e një prej raketave të rrëzuara Tochka-U dëmtuan një ndërtesë apartamentesh në qytetin e Belgorod,” tha ministria.