Rama anulon konferencën, zbardhet lëvizja e fundit e tij

Kryeministri Edi Rama ka ndryshuar planin për komunikimin e paralajmëruar me qytetarët pas kthimit nga New York-u.

Rama mbërriti rreth orës 13:20 në Aeroportin Ndërkombëtar “Nënë Tereza”, por ndryshe nga sa ishte paralajmëruar, nuk do të zhvillojë konferencë për shtyp në sallën e medias në Rinas.

Sipas informacioneve të fundit, kryeministri ka vendosur që komunikimi të mos bëhet live nga aeroporti. Në vend të konferencës, pritet të publikojë një video-mesazh drejtuar qytetarëve.

Mbërritja e Ramës në Rinas ishte shoqëruar me masa të shtuara sigurie, ndërsa në aeroport ndodheshin automjeti i kryeministrit, efektivë të Gardës së Republikës, forca të FNSH-së dhe punonjës të Policisë së Shtetit.

Prania e strukturave të sigurisë dhe njoftimi paraprak për një komunikim të rëndësishëm të kryeministrit kishin shtuar interesin rreth mbërritjes së tij në aeroport.

Tashmë vëmendja është përqendruar te video-mesazhi që pritet të publikohet nga Rama, përmes të cilit do të bëhet e ditur edhe përmbajtja e komunikimit të paralajmëruar.