Luksi i Fluturimeve

Nëse ka një fushë ku gazetarët i Blendi Fevziu apo Sokol Balla, njihen për pasionin e tyre, ai është padyshim udhëtimi. Chek-in e tyre në cepa të ndryshëm të globit apo postimet nga destinacionet ekzotike janë tashmë të famshme. Por, Kryeministri Edi Rama duket se ka vendosur t’u bëjë një “konkurrencë” të fortë Fevziut që e quajti me ironi “udhëkar”. Ndryshimi i vetëm, por thelbësor? Ndërsa gazetarët udhëtojnë me linja komerciale, Edi Rama mban një rekord krejt tjetër: ai preferon fluturimet me avionë charter, të paguara nga paratë e taksapaguesve shqiptarë.

Këtë të premte, kreu i qeverisë ka zgjeruar sërish hartën e tij të udhëtimeve diplomatike, duke u zhvendosur nga metropolet komode europiane drejt Azisë Lindore. I shoqëruar nga bashkëshortja e tij, Linda Rama, dhe një delegacion zyrtar, Rama ka udhëtuar drejt Koresë së Jugut. Çmimi i kësaj “shëtitjeje” aziatike? Vetëm fatura e fluturimit charter vlerësohet të ketë kaluar shifrën e kripur prej 300 mijë dollarësh.

Leksione Demokracie në Seul, me Faturë të Kripur në Tiranë

Kjo faturë marramendëse, ku nuk përfshihen ende kostot e akomodimit në hotelet luksoze të Seulit dhe shpenzimet e tjera të delegacionit, vjen në një moment delikat për vendin. Ndërsa familjet shqiptare përballen çdo ditë me krizën e kostos së jetesës dhe rritjen galopante të çmimeve, Kryeministri zgjedh komoditetin e një avioni privat për të përshkuar globin.

Nëse udhëtimet e shpeshta në Europë gjithmonë na janë “shitur” nën ambalazhin e ndritshëm të integrimit europian, ky udhëtim në Korenë e Jugut është projektuar si një mundësi për “thellimin e bashkëpunimit strategjik”. Megjithatë, përtej gjuhës standarde dhe sterile të diplomacisë, të dyja vendet nuk kanë ndonjë histori të spikatur të shkëmbimeve ekonomike apo marrëdhënieve strategjike – një realitet që diktohet edhe nga largësia e madhe gjeografike.

Sipas agjendës zyrtare, arsyeja kryesore e këtij udhëtimi është një fjalim që Rama pritet të mbajë në një konferencë ndërkombëtare të lidershipit aziatik, ku do të diskutohet për:
Sfidat globale dhe ndryshimet gjeopolitike.
Rolin e inteligjencës artificiale në qeverisje.
Modelet e demokracisë dhe lidershipit.
Paradoksi Shqiptar që Eksportohet në Azi
Kontrasti midis realitetit brenda vendit dhe fasadës jashtë tij nuk mund të ishte më i dukshëm. Ndërkohë që Shqipëria renditet ende ndër vendet me të ardhurat më të ulëta në rajon dhe përballet me sfida akute si korrupsioni galopant, shpopullimi dhe rënia e besimit te institucionet, kryeministri zgjedh skenat ndërkombëtare për të dhënë leksione qeverisjeje dhe demokracie.

Ky është paradoksi i madh shqiptar që kësaj radhe eksportohet deri në Azi. Vetëm se, ndryshe nga emisionet e bukura të udhëtimeve që shohim në televizion, këtë biletë luksoze prej 300 mijë dollarësh nuk e paguajnë sponsorët, por qytetarët më të varfër të Europës.