Banorët kërkojnë drejtësi, jo fjalë

Vizita e kryeministrit Edi Rama në Theth për të prezantuar të ashtuquajturën “Paketa e Maleve” ka sjellë reagime të forta në rrjetet sociale. Aktivisti Haris Vongli e ka cilësuar nismën si një përpjekje për të rikthyer premtime që, sipas tij, janë shkelur më parë.

Në reagimin e tij, Vongli kujton se para zgjedhjeve parlamentare të vitit 2025 banorëve të Thethit iu premtua zgjidhja përfundimtare e çështjes së pronave dhe mbrojtja e të drejtës për të jetuar e punuar në tokën e tyre. Sipas tij, pas zgjedhjeve këto premtime nuk u mbajtën dhe në vend të zgjidhjeve erdhën prishjet e objekteve dhe dëmtimi i bizneseve të ngritura ndër vite.

Ai ndalet edhe te transmetimi live i kryeministrit, duke pretenduar se Rama shfaqi konfuzion gjatë shpjegimit të paketës ligjore, ndërsa transmetimi u ndërpre dhe nisi sërish.

Sipas Vonglit, deklaratat se kundërshtarët e “Paketës së Maleve” pengojnë zhvillimin e zonave malore janë kontradiktore, pasi ai argumenton se ishin pikërisht vendimet e qeverisë që u mohuan banorëve të Thethit të drejtën për pronën dhe investimet e tyre.

Në përfundim të reagimit, ai shprehet se banorët e Thethit nuk kanë nevojë për premtime të reja, por për drejtësi, siguri juridike dhe respekt për pronën, investimet dhe dinjitetin e tyre.