Reshjet e shiut paralizojnë aksin Gramsh–Moglicë–Korçë

Reshjet e dendura të orëve të fundit kanë shkaktuar bllokimin e aksit rrugor Gramsh–Moglicë–Korçë, konkretisht në segmentin pranë fshatit Gopesh, në bashkinë e Gramshit.

Sipas qytetarëve që ndodhen në zonë, rruga ka më shumë se dy orë që është e pakalueshme, ndërsa deri tani nuk ka mbërritur asnjë mjet për të ndërhyrë dhe për të bërë të mundur hapjen e saj.

Banorët shprehen se kanë kontaktuar administratorin e zonës për të kërkuar ndërhyrje urgjente, por pavarësisht njoftimeve të përsëritura, ende nuk është marrë asnjë masë konkrete në terren.

Situata vijon të mbetet problematike, ndërsa drejtuesit e automjeteve dhe banorët kërkojnë reagim të menjëhershëm nga autoritetet përgjegjëse për zhbllokimin e rrugës dhe garantimin e qarkullimit të sigurt në këtë aks të rëndësishëm.