Analiza e CNN për balotazhin në Francë

 

Francezët votuan të dielën e 10 prillit për Presidentin e ri të vendit, por siç pritej, për kreun e ri të shtetit do të ketë një raund të dytë.

As presidenti aktual Macron, as nacionalistja Le Pen nuk e arritën dot shumicën absolute.

Macron, duket se ka siguruar 28.6% të votave nga raundi i parë i zgjedhjeve të dielën, duke e vendosur atë në vendin e parë, ndërsa Le Pen, ka dalë e dyta me 23.6% të votave.

Dymbëdhjetë kandidatë konkurruan për postin e lartë. Meqenëse asnjëri prej tyre nuk mori më shumë se 50% të votave në raundin e parë, Macron dhe Le Pen do të përballen me njëri-tjetrin në balotazhin e 24 prillit.

Nga një analizë e rezultateve të para të dala pas mbylljes së kutive të votimit, CNN shkruan se ata do të rindeshen si në garën e 2017-ës.

Sondazhi nga Ifop-Fiducial i publikuar të dielën tregoi se Macron do ta fitonte me gjasë garën në raundin e dytë kundër Le Pen me një diferencë të vogël, vetëm 51% ndaj 49% për Le Pen, shkruan CNN.

Mbështetja për Le Pen është rritur në mënyrë të vazhdueshme javët e fundit.

Megjithëse ajo njihet më së shumti për politikat e saj të së djathtës ekstreme, si kufizimi drastik i imigrimit dhe ndalimi i mbajtjes së shamive nga besimtarët muslimanë në vende publike, ajo ka drejtuar një fushatë më të zakonshme këtë herë, duke zbutur gjuhën e saj dhe duke u fokusuar më shumë në çështjet ekonomike, si rritja e kostos së jetesës, një shqetësim kryesor ky për elektoratin francez.

Në fjalimin e saj të dielën, Le Pen u zotua se do të jetë presidente e “të gjithë francezëve” nëse fiton raundin e dytë dhe u bëri thirrje atyre që nuk votuan për Macron ta mbështesin atë në raundin e dytë.

Që prej dy dekadash, asnjë president francez nuk ka fituar një mandat të dytë në detyrë.

Macron po kërkon të bëhet presidenti i parë francez që rizgjidhet President që nga koha kur Zhak Shirak u rizgjodh në 2002.

Rindeshja

Macron mundi Le Pen pesë vjet më parë, por ekspertët kanë thënë se një garë e dytë mes të dyve do të ishte shumë më e fortë se gara e 2017-ës.

Macron nuk është më në fillimet e tij politike dhe tani kandidon me një histori të përzier pas tij.

Ndërsa plani i tij ambicioz për të forcuar autonominë dhe peshën gjeopolitike të Bashkimit Evropian i dha atij respekt jashtë dhe brenda endit, ai mbetet një figurë përçarëse kur bëhet fjalë për politikat e brendshme, shkruan CNN.

Trajtimi që ai i bëri lëvizjes së jelekëve të verdhë, një nga protestat më të zgjatura në kohë në Francë prej dekadash, e ka “goditur atë” dhe rezultatet e politikave të tij për pandeminë Covid-19 nuk janë përfundimtare.

Politika e nënshkruara nga Macron gjatë krizës së pandemisë, që i kërkonin njerëzve të tregonin pasaportat e vaksinimit për të vijuar jetën normalisht, ndihmoi në rritjen e normave të vaksinimit, por bëri që një pakicë e zëshme të ngrihej kundër presidencës së tij.

“Pakënaqësia e përhapur ndaj Macron (veçanërisht në mesin e të rinjve) do të thotë se rezultati është i pasigurt dhe i paparashikueshëm. Le Pen do të vazhdojë ta shfrytëzojë këtë dhe një trazirë e madhe politike mbetet e mundshme,” tha komentatori i çështjeve evropiane të CNN, Dominic Thomas.

“Sado që ata të mos e pëlqejnë Le Penin, ka shumë dallime mes saj dhe Macron-it dhe se si ajo do të rrezikonte politikën evropiane dhe globale”.