Robert Rakipllari kalon tek Top Channel

Përditësuar më 13 Dhjetor 2023, 14:34

Prej gati 20 vitesh në mediat e Iran Hysenbelliut, Robert Rakipllari është larguar nga drejtimi i televizionit “News 24” dhe “Fokus Media Group” për të shkuar drejt televizionit kombëtar “Top Channel”.

Rakipllari  do të marrë drejtimin e “Top Channel”.

Burime të besuara  konfirmojnë se Aleksandër Çipa, gazetari me përvojë, do të jetë personi, i cili do të marrë drejtimin e “News 24”.

Presidenti i “Hysenbelliu group” z.Irfan Hysenbelliu prezantoi para stafit të medias drejtorin e ri të Përgjithshëm, të cilit i është besuar drejtimi i mediave më të rëndësishme në tregun mediatik shqiptar.

Kjo detyrë i është besuar Aleksandër Çipës, një figurë me përvojë të gjatë në televizion dhe në gazetari dhe themelues i Unionit të Gazetarëve në Shqipëri.

Teksa bëri prezantimin para bordit dhe gazetarëve, Z.Irfan Hysenbelliu premtoi risi për vitin e ri. Ai vlerësoi bashkëpunimin për gati 2 dekada me Robert Rakipllarin, gjatë drejtimit të tij të grupit mediatik. “Me Robert Rakipllarin kemi patur një bashkëpunim të sinqertë për 18 vjet. Përvoja që krijoi në drejtimin e grupit mediatik do t’i shërbejë në suksesin e mëtejshëm të tij”, tha z.Hysenbelliu dhe e uroi për rrugën e tij drejt eksperiencave të reja.

Z.Hysenbelliu theksoi se Aleksandër Çipa është një njohës i mirë i medias dhe ka përvojë të gjatë në gazetari, përvojë që do ta përcjellë me sukses në punën e tij në krye të medias së grupit. “Kam besim se përvoja e tij do të shërbejë që grupi ynë mediatik të mbetet i pari në tregun e informacionit dhe televizionin News24 të jetë si gjithmonë, televizioni i të gjithë shqiptarëve dhe i pari për lajmin e minutës së fundit dhe të saktë.”, tha Z.Hysenbelliu.