Berisha akuzon kryeministrin për kontrabandë armësh 

Kreu i Partisë Demokratike, Sali Berisha, ka ngritur akuza të forta ndaj kryeministrit Edi Rama, duke e lidhur atë me aktivitetet që ai i cilëson si kontrabandë armësh dhe trafiqe kriminale.

Në një konferencë për mediat, Berisha deklaroi se biznesmeni izraelit Ron Yeffet, banesa dhe zyrat e të cilit janë kontrolluar nga strukturat e drejtësisë, ka telefonuar disa herë kryeministrin Edi Rama gjatë kohës së kontrolleve.

Sipas kryedemokratit, gjatë kontrollit Yeffet ka tentuar të kontaktojë gjithashtu Linda Ramën. Berisha tha se informacioni i është përcjellë përmes asaj që ai e cilësoi si “qytetari dixhital”, ndërsa theksoi se verifikimi i këtyre pretendimeve i takon organeve të drejtësisë.

Berisha deklaroi gjithashtu se kompania e biznesmenit izraelit ka përfituar 45 milionë euro nga buxheti i shtetit, si dhe prona shtetërore me vlerë prej dhjetëra milionë eurosh.

Duke folur për lidhjet që ai pretendon se ekzistojnë mes politikës, biznesit dhe trafiqeve kriminale, kreu i PD-së u shpreh:

“Armë dhe droga dhe armët janë binjakë të trafiqeve kriminale dhe ilegale. Të dhënat të pakundërshtueshme faktojnë se padrinoja apo kreu i narkoshtetit Edi Rama është kujdesur në maksimum që fitimet e tij të kenë sigurinë, tregtinë e armëve dhe kontrabandën e armëve. Historia e të famshmit Ron Yeffet është histori personale e Edi Ramës. Ky personazh, i implikuar në një mori aferash mafioze korruptive, si përfaqësues i Edi Ramës, u kontrollua para pak ditësh në banesën e tij nga organet ligjzbatuese.

Qytetari dixhital informoi se nga kontrolli ai mbeti i fantaksur se nuk e besonte kurrë por ajo që ka më rëndësi, se ai gjatë kontrollit, mori të paktën 4 herë në telefon Edi Ramën dhe tre herë Linda Ramën, por në telefon nuk iu përgjigj njeri. Sidoqoftë këto janë çështjet të drejtësisë dhe do t’i verifikojë ajo”, – tha Berisha.

Deklaratat e Berishës vijnë në një moment kur aktiviteti i Ron Yeffet dhe marrëdhëniet e tij me kompani që kanë përfituar kontrata apo asete publike janë vënë në qendër të vëmendjes së strukturave të drejtësisë.

Akuzat e ngritura nga kreu i PD-së ndaj kryeministrit dhe personave të përmendur prej tij mbeten pretendime politike dhe publike, ndërsa çdo përgjegjësi eventuale penale duhet të përcaktohet përmes hetimeve dhe vendimeve të organeve kompetente të drejtësisë.