Rrezikoi pushuesit, gjobitet drejtuesi i Jet Ski-së në Velipojë

Shërbimet e Policisë Kufitare, në bashkëpunim me Njësinë Policore Detare dhe Stacionin e Policisë Kufitare në Velipojë, kanë shtuar kontrollet dhe patrullimet përgjatë vijës bregdetare, me qëllim garantimin e sigurisë për pushuesit.

Gjatë një patrullimi rutinë, policia është njoftuar nga qytetarët se një mjet lundrues tip Jet Ski po lëvizte shumë pranë bregut, duke rrezikuar personat që ndodheshin në plazh.

Menjëherë pas sinjalizimit, shërbimet policore kanë ndërhyrë dhe kanë identifikuar mjetin, i cili drejtohej nga shtetasi me inicialet R. Gj.

Në përfundim të verifikimeve dhe procedurave administrative, drejtuesi i Jet Ski-t është ndëshkuar me një gjobë prej 100.000 lekësh të rinj, për shkelje të rregullave të sigurisë në zonat bregdetare.