Rriten çmimet e karburanteve, ‘shpërthen’ Braçe: Ktheni Bordin e Transparencës

Rritja e fortë e çmimit të karburanteve ka sjellë reagimin e deputetit të Partisë Socialiste, Erion Braçe, i cili kërkon rikthimin e menjëhershëm të Bordit të Transparencës. Sipas tij, shtrenjtimi i naftës në kulmin e sezonit turistik nuk është rastësi, por një veprim i qëllimshëm që rrezikon seriozisht turizmin në vend.

Në një reagim publik, Braçe thekson se gjatë ditës çmimi i naftës ka arritur në 214-216 lekë për litër, ndërsa karburanti premium shitet deri në 230 lekë për litër, duke rënduar ndjeshëm kostot për qytetarët dhe pushuesit.

“Nafta kërceu sot në 214-216 lekë për litër. Nafta tjetër, ajo e mira që nuk ta dëmton makinën, nis me 218 dhe arrin në 230 lekë për litër”, shprehet ai.

Deputeti socialist ngre dyshime të forta mbi momentin e zgjedhur për rritjen e çmimeve, duke theksuar se kjo ka ndodhur pikërisht në prag të fundjavës, kur lëvizja drejt zonave turistike është më intensive.

“Tregtarët e rritën çmimin në nisje të fundjavës, kur ndodh fluksi më i madh i pushuesve të korrikut që kthehen dhe i atyre të gushtit që nisen drejt destinacioneve turistike. E qëllimshme? Ja bën muuuuuuuu!”, deklaron Braçe.

Ai kujton se këtë situatë e kishte paralajmëruar më herët, duke kërkuar rikthimin e Bordit të Transparencës si një mekanizëm kontrolli për tregun e karburanteve.

“Një javë e pak më parë kërkova kthimin në punë të Bordit. E dija që ata që nuk fituan me lopatë gjatë kohës së Bordit, do të bënin çmos të fitonin me kovën e skrepit tani, në pikun e sezonit”, thekson ai.

Sipas Braçes, ndërhyrja përmes Bordit është e domosdoshme për të frenuar abuzimet dhe për të mbrojtur sezonin turistik nga një goditje e mundshme ekonomike.

“Duhet Bordi, që këta të mos i japin një goditje fatale sezonit në kulmin e tij, duke shtrenjtuar e thuajse kufizuar lëvizshmërinë nëpër destinacionet e këtij vendi”, përfundon deputeti.

Rritja e çmimeve të karburanteve vijon të mbetet një nga shqetësimet kryesore për qytetarët dhe bizneset, sidomos në një periudhë kur turizmi përbën një nga shtyllat kryesore të ekonomisë.