Reagon drejtori i Komunikimit në Kryeministri Endri Fuga, pas publikimit të djeshëm të audiopërgjimit ku Denar Biba shantazhonte gjykatësin e Strasburgut Ledi Biankun.
“Përgojojnë njerëz e flasin për shifra, kot t’u përgjigjesh! Qeveria e ka fokusuar vëmendjen te njerëzit. Qeveria ështe vendosur të çojë përpara reformat!”, thotë mes të tjerash Fuga.
Dje, “Exit.al” publikoi audiopërgjimin që tregonte se si Biba shantazhonte Bianku, teksa biseda e zbardhur është kjo:
“Më mori Engjëll Agaçi, Sekretari i Përgjithshëm i Këshillit të Ministrave, e më thotë ç’e ke Ledi Biankun? I thashë… Më thonë që nga gjithë këta që kemi afër ne ti e ke [më afër]. [Agaçi më] tha… hajde të pijmë një kafe… ky muhabet të mërkurë, të enjte… Tha, kemi këto problemet, e di ti gjithë kjo historia që do kërkohet shtyrja. Të lutem tha, ti lutesh të na gjendet në gjithë këtë histori … sot është Niko Peleshi [këtu në Strasburg] ka takim [me Kryetarin e GJEDNJ-së]”
Biba vazhdon:
“Ma paguan ata biletën…” Pastaj, Biba i drejtohet Biankut për ta bindur që të pranojë të ndikojë: “A të ndalon më ky tren në stacion? Të ngelesh pa punë dhe ç’të vajti sakrifica! Njeriu bën kompromise në jetë.”
Gjykatësi Bianku, i kontaktuar nga Exit.al ka pranuar se është shantazhuar dhe ka vënë në dijeni kreun e Gjykatës së Strasburgut.
