dyshimet bien mbi AKEP dhe tenderat e mirëmbajtjes

TIRANË – Një skandal i paprecedentë dhe me përmasa të rënda administrative e teknike ka shpërthyer ditën e sotme, duke lënë Shqipërinë në një “blackout” të plotë digjital. Prej orësh, çdo uebsajt dhe portal mediatik që mban prapashtesën kombëtare .al është zhdukur totalisht nga rrjeti i internetit, si brenda ashtu edhe jashtë vendit.

Sipas burimeve të para, dyshohet se ky dështim katastrofik nuk ka ardhur nga ndonjë sulm kibernetik prej hakerave, por nga vetë zyrat e institucionit që menaxhon këto domaine: AKEP (Autoriteti i Komunikimeve Elektronike dhe Postare).

Avari në Serverat Rrënjë (Root DNS)

Ekspertët e fushës dyshojnë fort se një avari madhore në Serverat Rrënjë (Root DNS) të AKEP-it ka fshirë “hartën” e internetit shqiptar. Kjo ka bërë që asnjë sistem global të mos njohë më adresat me prapashtesën .al, duke sjellë paralizim të plotë të bizneseve, mediave dhe shërbimeve online.

Ngërçi raportohet të jetë aq i thellë, sa kanë dështuar edhe mjetet klasike të emergjencës si përdorimi i rrjeteve private VPN. Kur “truri” qendror i AKEP-it nuk përgjigjet, adresat thjesht pushojnë së ekzistuari për botën digjitale.

Sipas të dhënave dhe dyshimeve të ngritura në rrethet mediatike, në qendër të kritikave për këtë kolaps teknik pritet të vihet edhe kompania Infosoft, nën drejtimin e Armand Sharrës. Ky operator ekonomik raportohet se mban kontratën zyrtare për mirëmbajtjen e të gjithë sistemit të Serverave Rrënjë (Root DNS) të AKEP-it. Ky fakt shton akoma më shumë dritëhije mbi përgjegjësinë e kësaj avarie madhore, pasi kontrata të këtij niveli supozohet të garantojnë siguri maksimale dhe plane emergjence (back-up) të menjëhershme, elemente që dështuan totalisht duke izoluar Shqipërinë nga rrjeti global.

Pikëpyetjet mbi tenderat miliona lekësh

Kjo situatë ka ngritur menjëherë pikëpyetje të mëdha mbi menaxhimin e institucionit. AKEP njihet si një nga institucionet që xhiron fonde të konsiderueshme dhe tenderon miliona lekë rregullisht për përmirësimin, mbrojtjen dhe mirëmbajtjen e sistemeve të monitorimit dhe teknologjisë.

Vetëm pak kohë më parë, institucioni ka mbyllur procedura prokurimesh qindra miliona lekëshe pikërisht për mirëmbajtje sistemesh.

Pavarësisht këtyre shifrave të larta, realiteti i sotëm tregoi se mjafton një defekt në nyjen qendrore që i gjithë shteti, bankat dhe mediat online të kthehen pas në kohë, pa asnjë mundësi aksesi.

Heshtje nga institucioni

Deri më tani, nga ana e AKEP dhe zyrës së shtypit ka vetëm një heshtje, ndërsa nuk ka ende asnjë reagim zyrtar për të sqaruar qytetarët dhe bizneset e dëmtuara.

Ndërkohë, raportohet se ekspertët e tyre po përpiqen të ngjisin “copat” e një sistemi që u thërrmua në mes të ditës, duke cenuar rëndë sigurinë kombëtare dhe të drejtën e informimit.