Ngjarje tragjike në Kosovë

Një ngjarje e rëndë ka tronditur Malishevën, ku tre persona kanë humbur jetën si pasojë e shpërthimit të një bombole gazi brenda një banese.

Lajmi është konfirmuar nga Lumni Graishta, Drejtor i Policisë për Rajonin e Gjakovës, i cili bëri të ditur se viktimat janë një burrë 35-vjeçar dhe dy fëmijët e tij, të moshës 9 dhe 12 vjeç.

“Kemi tre viktima: babai 35-vjeçar dhe dy fëmijët e tij të moshës 9 dhe 12 vjeç”, deklaroi Graishta.

Sipas të dhënave paraprake, rreth orës 12:55 është raportuar për një zjarr në një banesë në lagjen “Mirëdita”. Menjëherë pas njoftimit, në vendngjarje kanë mbërritur njësitë policore, zjarrfikësit dhe ekipet emergjente, të cilat kanë ndërhyrë për neutralizimin e flakëve dhe menaxhimin e situatës.

Autoritetet po vijojnë hetimet për të zbardhur plotësisht shkaqet e shpërthimit, ndërsa ngjarja ka shkaktuar tronditje të madhe në komunitetin lokal.