Shqiptarët festojnë sot 81-vjetorin e Çlirimit

29 nëntori i vitit 1944 shënon një nga datat më të rëndësishme të historisë shqiptare: çlirimin e vendit nga pushtuesit gjermanë. Vetëm pak ditë pasi Tirana u çlirua më 17 nëntor, Komanda e Përgjithshme e Ushtrisë Nacionalçlirimtare njoftoi zyrtarisht edhe çlirimin e Shkodrës. Me këtë akt, 81 vite më parë, Shqipëria u shpall tërësisht e lirë.

Një luftë që e rreshtoi Shqipërinë në krahun e fitimtarëve

Lufta Antifashiste Nacionalçlirimtare konsiderohet një nga ngjarjet më të lavdishme të popullit shqiptar. Përveç largimit të pushtuesve italianë dhe gjermanë, kjo fitore e vendosi Shqipërinë krah aleatëve të mëdhenj të Luftës së Dytë Botërore:
Shteteve të Bashkuara të Amerikës, Britanisë së Madhe dhe Bashkimit Sovjetik.

Kjo luftë ripohün integritetin territorial të vendit, në një periudhë kur Shqipëria shihej si zonë e rrezikuar nga copëtimet e Fuqive të Mëdha dhe shteteve fqinje.

Ndryshe nga fqinjët, Shqipëria u çlirua pa ndihmën e Ushtrisë së Kuqe

Ndryshe nga vendet e tjera të Ballkanit, çlirimi i Shqipërisë u arrit pa hyrjen e ushtrisë sovjetike. Lufta ishte një lëvizje e gjerë popullore, me pjesëmarrje masive dhe bashkim të krahinave nga jugu në veri. Qytetet dhe fshatrat shqiptare u mobilizuan në mënyrë të paprecedentë, duke e bërë këtë luftë një nga përfshirjet më të mëdha në historinë tonë.

Si rezultat, Shqipëria u bë pjesë e koalicionit antifashist euroatlantik — një pozicion që ruan sot si anëtare e NATO-s.

Roli i misioneve aleate në Shqipëri

Edhe pse çlirimi u arrit nga forcat shqiptare, misionet aleate dhanë kontribute të rëndësishme gjatë Luftës Nacionalçlirimtare:

• Misioni britanik: Fillimisht i udhëhequr nga majori Billy MacLean, e më pas, pas kapjes rob të gjeneral brigade Edmond Davies, u drejtua nga Norman Wheeler dhe Alan Palmer.

• Misioni amerikan: Kryesohej nga Thomas Stefan.

• Misioni sovjetik: U drejtua nga majori Ilia Ivanov.

Prania e tyre shërbeu për koordinimin e veprimeve, furnizimin dhe komunikimin strategjik me Aleatët.