SKANDAL/ Deputetja e Ramës dorëzon nismën në Kuvend: Investitorët strategjikë të marrin portet pa procedurë konkurrimi

Një nismë ligjore e depozituar në Kuvend nga deputetja socialiste e qarkut të Vlorës, Zamira Sinaj, ka hapur një debat të fortë mbi fatin e pasurive strategjike të vendit.

Sipas projektligjit të dorëzuar, propozohet një shtesë në ligjin nr. 9710, datë 10.4.2007 “Për portet turistike në Republikën e Shqipërisë”, e ndryshuar, ku parashikohet që në rastet kur një subjekt ka marrë statusin “Investim/Investitor strategjik, procedurë e asistuar/e veçantë” nga Komiteti i Investimeve Strategjike, ndërtimi dhe operimi i porteve turistike të përjashtohet nga procedurat e zakonshme konkurruese.

Me fjalë të thjeshta: nëse je “investitor strategjik”, portin mund ta marrësh pa garë.

Çfarë ndryshon konkretisht?

Projektligji shton një paragraf në nenin 6 të ligjit ekzistues, duke parashikuar që ndërtimi dhe operimi i porteve turistike nga subjektet me status “investitor strategjik” të mos i nënshtrohet parashikimeve të procedurave konkurruese që zbatohen për subjektet e tjera.

Procedurat, rregullat dhe dokumentacioni për lidhjen e kontratave do të përcaktohen me vendim të Këshillit të Ministrave.

Pra, jo më garë e hapur. Jo më konkurrencë publike. Vendim qeverie.

Portet nuk janë resorte private

Kjo nuk është më thjesht një nismë teknike ligjore. Kjo është një deklaratë politike.

Portet janë asete strategjike kombëtare. Janë hyrje-dalje ekonomike, janë siguri kombëtare, janë territor publik. Nuk janë marina private për klientelën e pushtetit.

Qeveria flet për “harmonizim ligjor” dhe “lehtësim procedurash”. Por përkthimi praktik është i qartë: një investitor që merr statusin strategjik mund të shmangë garën.

Në një vend normal, asetet strategjike jepen me transparencë maksimale dhe me garë të hapur ndërkombëtare. Në Shqipëri, po institucionalizohet modeli i përjashtimit nga gara.

Shteti si agjenci shërbimi për oligarkët?

Kur në Kuvend depozitohen ligje që i japin një grupi të kufizuar biznesmenësh akses në asete strategjike pa konkurrim, lind një pyetje e fortë: a po kthehet shteti në agjenci shërbimi për investitorë të përzgjedhur?

Turizmi elitar po përdoret si justifikim për përqendrim elitar të pasurisë.

Çdo ligj i qepur me porosi për “investitorë strategjikë” është një tullë më shumë në murin e oligarkisë. Dhe çdo përjashtim nga gara është një hap më pak drejt ekonomisë së lirë dhe një hap më shumë drejt modelit klientelist.

Ku është opozita?

Pyetja është legjitime.

Nëse opozita hesht përballë një nisme që prek drejtpërdrejt asetet strategjike të vendit, atëherë ose është e pafuqishme, ose është pjesë e lojës. Në të dy rastet, humbësi është qytetari shqiptar.

Sot janë portet turistike. Nesër mund të jetë çdo aset tjetër.

Kjo nuk është çështje majtas apo djathtas. Është çështje nëse Shqipëria do të qeveriset nga gara e ndershme dhe ligji, apo nga përjashtimet, telefonatat dhe pazaret e mbyllura.