Mungon  sistemi i  mbrojtjeje nga zjarri

Rrugët publike në Shqipëri vijojnë të shndërrohen në burime pasurish për oligarkët e ndërtimit, ndërsa qytetarët mbeten përballë rrezikut dhe faturave të fryra. Tuneli i Skarficës, pjesë e segmentit Kardhiq–Delvinë, është një shembull tipik.

Ndërtimi i tij nisi vite më parë dhe u përurua në vitin 2022, mes bujës propagandistike dhe akuzave të shumta për abuzime. Tenderi i lotit 7, që përfshinte ndërtimin e tunelit, u çua deri në SPAK, ku ish-drejtoresha e Rrugëve, Sonila Qato, u hetua për shpërdorim detyre. Dyshohej se kishte favorizuar një kompani tjetër, por pas ankimimeve, kontrata prej 20 milionë euro përfundoi në duart e firmës “Gjoka” të oligarkut Rrok Gjoka.

Tre vite pas përurimit, kreu aktual i ARRSH-së, Tan Agolli, ka zbuluar një mangësi skandaloze: Tuneli i Skarficës nuk ka sistem mbrojtjeje nga zjarri. Një mungesë që vë në rrezik jetën e udhëtarëve dhe që e bën qesharake faktin se tani duhet të shpenzohen edhe 800 mijë euro shtesë për të vendosur diçka që duhej të ishte pjesë e projektit bazë.

ARRSH ka hapur një tender të ri për “krijimin e qendrës së MZSH dhe instalimet për mbrojtjen nga zjarri në tunelin Kardhiq–Delvinë”. Por ky zhvillim ngre pyetje thelbësore:

• Pse nuk u përfshi sistemi i mbrojtjes që në projektin origjinal?
• Kush mban përgjegjësi për këtë dështim – zyrtarët e sotëm, apo ata që përuruar me bujë një vepër të papërfunduar?
• A do të hetohet kompania “Gjoka”, e cila prej vitesh kontrollon tenderët e rrugëve me tunele, përfshirë edhe atë të Llogarasë në partneritet me një firmë turke?

Ky rast ekspozon mënyrën sesi paratë e taksapaguesve shpërdorohen dy herë: një herë për një ndërtim të paplotë, dhe një herë tjetër për të “rregulluar” gabimet e lëna qëllimisht.

Në vend që të garantojë siguri për qytetarët, shteti është kthyer në një bankomat për oligarkët e rrugëve. Një hetim i plotë është i domosdoshëm, jo vetëm për të gjetur fajtorët, por edhe për të ndalur këtë praktikë kriminale të ndërtimit të veprave publike me mangësi që rrezikojnë jetë njerëzish.

Tuneli i Skarficës nuk është thjesht një dështim teknik, por një tjetër monument i korrupsionit në infrastrukturën shqiptare.