Skandal në Policinë e Shkodrës, ish-drejtori me dron privat në operacione sekrete

Një raport i agjencisë së mbikëqyrjes policore ka nxjerrë në pah shkelje serioze të procedurave nga ish-drejtori i Policisë së Shkodrës, Gentian Berberi, i cili dyshohet se ka përdorur një dron privat gjatë operacioneve zyrtare.

Sipas dokumentit, pajisja ajrore pa pilot nuk rezulton e regjistruar apo e inventarizuar si aset i Policisë së Shtetit, megjithëse është përdorur në disa aksione të rëndësishme në terren. Ky fakt përbën shkelje të drejtpërdrejtë të rregullave të përcaktuara për administrimin dhe përdorimin e pajisjeve të tilla.

Raporti detajon se droni është përdorur për mbikëqyrje ajrore të banesave të personave në kërkim, si dhe në operacione kundër kultivimit të lëndëve narkotike në zonat e Vaut të Dejës, Velipojës dhe Shkodrës.

Një ndër elementët më problematikë të konstatuar lidhet me menaxhimin e materialeve të regjistruara. Pas përfundimit të operacioneve, pamjet filmike janë shkarkuar nga pajisja, ndërsa karta e memories është mbajtur bashkë me dronin, pa u administruar sipas procedurave zyrtare të Policisë së Shtetit.

Sipas dëshmive të punonjësve të policisë, pajisja ishte në përdorim të drejtpërdrejtë nga Gentian Berberi dhe më 22 qershor 2026 i ishte dorëzuar atij në Komisariatin e Policisë në Vau të Dejës.

Në përfundim, raporti arrin në konkluzionin se përdorimi i dronit është kryer në kundërshtim me Procedurën Standarde të Punës për pajisjet ajrore pa pilot, për shkak se nuk ishte pjesë e inventarit zyrtar dhe nuk janë respektuar detyrimet për regjistrimin dhe dokumentimin e tij.

Ndërkohë, ndaj ish-drejtuesit është nisur edhe procedim disiplinor për sjellje të papërshtatshme gjatë dorëzimit të detyrës dhe komunikimit me drejtues të lartë të Policisë së Shtetit.