S’mjaftojnë 140 milionë€, ‘Smart City’ ‘gllabëron’ sërish para të tjera

Një nga projektet më të diskutuara në muajt e fundit është pa dyshim iniciativa “Smart City”, përmes së cilës shteti shqiptar parashikon të investojë rreth 140 milionë euro për instalimin e një rrjeti të gjerë kamerash në rrugë dhe hapësira publike. Qëllimi zyrtar i këtij projekti është identifikimi i shkeljeve dhe monitorimi i individëve problematikë, si shtetas vendas ashtu edhe të huaj.

Financimi i këtij projekti është siguruar nga një fond i Emirateve të Bashkuara Arabe. Paralelisht me këtë zhvillim, qeveria ka ndërmarrë hapa të shpejtë institucionalë, duke krijuar një kompani shtetërore të posaçme, të regjistruar në Qendrën Kombëtare të Biznesit (QKB). Kjo strukturë ka filluar menjëherë organizimin e saj të brendshëm, duke përcaktuar nivelet e pagave dhe duke hapur proceset e rekrutimit për stafin.

Megjithatë, pavarësisht vlerës së konsiderueshme financiare të projektit, duket se kostot nuk ndalen vetëm tek 140 milionë eurot fillestare. Projekti është shoqëruar me kritika për mënyrën e realizimit, duke qenë se procedurat nuk janë zhvilluar përmes një gare të hapur prokurimi, por kryesisht përmes negociatave. Në këtë proces, disa ministra kanë refuzuar të firmosin dokumentacionin përkatës, çka ka sjellë ndërhyrje në nivele më të larta vendimmarrëse për të çuar përpara nismën, përfshirë angazhimin e zëvendësministrave për finalizimin e saj.

Në një kohë shumë të shkurtër, disa institucione shtetërore kanë nxjerrë akte ligjore dhe nënligjore, kanë ratifikuar marrëveshje dhe kanë përfunduar procedura administrative në QKB. Hapi i fundit në këtë zinxhir veprimesh është përzgjedhja e një kompanie që do të kryejë mbikëqyrjen e projektit.

Për këtë qëllim, është hapur një procedurë prokurimi me objekt “mbikëqyrje e projektit të sistemit të kamerave nën administrimin e Policisë së Shtetit ‘Smart City’”. Autoriteti kontraktues është Operatori i Blerjeve të Përqendruara, ndërsa fondi limit i kësaj procedure arrin në 49.501.930 lekë, që përkthehet në mbi gjysmë milioni euro.

Ky tender vjen në një moment kur qeveria ka nisur zyrtarisht zbatimin e projektit. Sipas njoftimeve të mëparshme, drejtuesit dhe menaxherët e projektit do të përfitojnë paga mujore rreth 170 mijë lekë, ndërsa koordinatorët dhe stafi teknik do të paguhen me rreth 141 mijë lekë në muaj.

Aktualisht, shteti shqiptar është në fazën e ndërtimit të strukturës që do të administrojë këtë rrjet të gjerë kamerash dhe sisteme inteligjente, të cilat do të jenë nën varësinë e Policisë së Shtetit. Faza e parë e projektit parashikon vendosjen e rreth 5 mijë kamerave inteligjente në rrugët kryesore të vendit dhe në afërsi të 20 shkollave.

Në vijim, projekti synon të zgjerohet në të gjitha qytetet kryesore, duke krijuar një sistem të integruar monitorimi në nivel kombëtar. Vlen të theksohet se në fazat fillestare projekti ishte parashikuar me një kosto prej 60 milionë euro, por më pas kjo vlerë është rritur ndjeshëm, duke arritur në 140 milionë euro.