SPAK kërkon arrestimin, Berisha: Rama ‘mbrohet’ pas fustanit të Lubisë

Kryetari i Partisë Demokratike, Sali Berisha, ka reaguar ashpër pas kërkesës së SPAK për heqjen e imunitetit dhe arrestimin e zv/kryeministres Belinda Balluku, duke akuzuar kryeministrin Edi Rama se po e mbron atë për interesa personale.

Berisha shprehet se Rama do të vazhdojë ta mbrojë “numrin dy të qeverisë” me çdo kusht, duke e cilësuar këtë si një akt vetëmbrojtjeje politike dhe financiare.

“Jetën e japim, Lubinë nuk e japim”, shkruan Berisha, duke ironizuar qëndrimin e kryeministrit dhe duke shtuar se Rama do të përdorë “fustanin e Lubisë si mburojë” për t’u fshehur përballë drejtësisë.

Sipas Berishës, reagimi i Ramës ndaj kërkesës së Prokurorisë tregon qartë se ai është i vendosur ta mbrojë Ballukun, pasi, siç pretendon kreu i PD-së, të dy ndajnë interesa të përbashkëta financiare.

“50 milionë euro i kanë ndarë bashkë”, akuzon Berisha, pa dhënë detaje konkrete, por duke e paraqitur çështjen si një aferë të rëndë që, sipas tij, shpjegon mbrojtjen politike të Ramës.

Në fund të reagimit, Berisha u bën thirrje qytetarëve t’i bashkohen protestës së thirrur nga opozita më 22 dhjetor, duke theksuar se “fjala përfundimtare do të vijë nga populli”.

Deklarata e Berishës vjen në një moment tensioni të lartë politik, ndërsa zhvillimet rreth hetimeve të SPAK pritet të përshkallëzojnë më tej përplasjet mes mazhorancës dhe opozitës.