SPAK nis hetim për çështjen e pagave të magjistratëve

Prokuroria e Posaçme Kundër Korrupsionit dhe Krimit të Organizuar, SPAK, ka nisur një hetim lidhur me çështjen e pagave të magjistratëve.

Në kuadër të hetimeve, mësohet se janë sekuestruar dokumente në Ministrinë e Financave.

Gjyqtarët kanë depozituar një kallëzim penal në SPAK lidhur me mosekzekutimin e pagave të gjyqtarëve dhe prokurorëve për muajin gusht 2026.

Në kallëzim kërkohet që prokuroria të hetojë rrethanat e krijuara dhe të identifikojë personin ose personat që kanë marrë, transmetuar apo zbatuar vendimmarrjen që ka sjellë mosdhënien e pagave.

Mes personave të kallëzuar është edhe ministri i Financave, Petrit Malaj.

Në kallëzim argumentohet se situata nuk prek vetëm një magjistrat, por një numër të konsiderueshëm gjyqtarësh dhe prokurorësh në të gjithë vendin.

Sipas kallëzimit, synimi i hetimit është përcaktimi i përgjegjësisë individuale për veprimet ose mosveprimet konkrete që kanë çuar në mosekzekutimin e pagave.

Hetimi i SPAK pritet të sqarojë rrethanat e çështjes, vendimmarrjen që ka paraprirë mosdhënien e pagave dhe përgjegjësitë eventuale të personave të përfshirë.