Sulm iranian ndaj bazës amerikane, plagosen 10 ushtarë

Të paktën 10 pjesëtarë të forcave amerikane janë plagosur pas një sulmi me raketa dhe dronë nga Irani ndaj bazës ajrore Prince Sultan Air Base në Arabinë Saudite, sipas zyrtarëve amerikanë.

Sipas raportimeve fillestare, nuk ka viktima, ndërsa dy prej ushtarëve kanë pësuar lëndime nga copëza shpërthyese, të cilat nuk konsiderohen kërcënuese për jetën. Të tjerë janë prekur nga goditja, por detajet mbi gjendjen e tyre mbeten ende të paqarta.

Sulmi goditi një ndërtesë brenda bazës ku ndodheshin ushtarët amerikanë në momentin e shpërthimit. Si pasojë e goditjes është dëmtuar edhe të paktën një avion cisternë për furnizim me karburant.

Ky është një tjetër episod i përshkallëzimit të tensioneve në Lindjen e Mesme, ku bazat amerikane në rajon vijojnë të jenë objektiv i sulmeve të lidhura me konfliktin në zhvillim.