Të shtëna me armë zjarri në Lushnje

Të shtëna me armë janë regjistruar mëngjesin e sotëm në qytetin e Lushnjës, duke shkaktuar panik tek banorët e zonës. Ngjarja ka ndodhur në afërsi të kryqëzimit pranë spitalit, ku autorët kanë qëlluar drejt një automjeti.

Deri tani nuk raportohet për persona të lënduar, ndërsa identiteti i synuar apo motivi i sulmit mbetet i paqartë. Në vendngjarje janë gjetur gëzhoja, ndërsa forcat e policisë po vijojnë punën për të sqaruar rrethanat e incidentit dhe për të identifikuar përgjegjësit.

Paraprakisht, mësohet se në fshatin Lifaj është konstatuar një automjet i djegur, çka ngre dyshime për një atentat të mundshëm, duke shtuar pasigurinë për sigurinë në zonë.

Hetimet vijojnë dhe policia ka forcuar patrullimet në qytet dhe rrethinat për të parandaluar ndonjë incident tjetër.