Të shtënat me armë në Jug, policia zbardh detajet e ngjarjes

Policia e Shtetit ka reaguar zyrtarisht pas ngjarjes së regjistruar mbrëmjen e së dielës në zonën bregdetare përballë Palasës, ku u raportuan të shtëna me armë zjarri nga një jaht.

Sipas njoftimit zyrtar, rreth orës 21:00 autoritetet morën informacion se nga një mjet lundrues në det dyshohej se ishte qëlluar me armë zjarri në ajër.

Menjëherë pas sinjalizimit, shërbimet e Policisë Kufitare dhe të Njësisë Policore Detare nisën ndjekjen e jahtit për ta lokalizuar dhe ndaluar.

Njëkohësisht, efektivët e Komisariatit të Policisë Himarë dhe Stacionit të Policisë Dhërmi kanë zhvilluar kontrolle nga toka përgjatë vijës bregdetare, në kuadër të operacionit për zbardhjen e plotë të rrethanave të incidentit.

Autoritetet bëjnë me dije se operacioni është ende në zhvillim dhe se po kryhen verifikime për të dokumentuar ngjarjen dhe për të identifikuar personat e përfshirë.

Policia njofton se, pas përfundimit të operacionit dhe veprimeve të para hetimore, do të publikojë një informacion të plotë mbi rastin.

Njoftimi i Policisë

“Rreth orës 21:00 është njoftuar se nga një jaht në det, përballë Palasës, dyshohet se është qëlluar me armë zjarri në ajër.

Menjëherë pas marrjes së njoftimit, shërbimet e Policisë Kufitare dhe të Njësisë Policore Detare janë vënë në ndjekje të jahtit.

Njëkohësisht, janë njoftuar edhe shërbimet e Komisariatit të Policisë Himarë dhe të Stacionit të Policisë Dhërmi, të cilat po kryejnë kontrolle nga toka përgjatë vijës bregdetare.

Vijon ndjekja e mjetit lundrues, me qëllim verifikimin e informacionit dhe dokumentimin e plotë të ngjarjes.

Në përfundim të operacionit për ndalimin e jahtit dhe të veprimeve të para hetimore do të jepet informacion i plotë për rastin.”