Të shtënat me armë në Maminas, breshëri plumbash drejt kompleksit luksoz të Eugert Lazajt, biznesmenit që u vetëvra dy muaj më parë

Kompleksi luksoz është në pronësi të biznesmenit Eugert Lazaj, i cili u vetëvra me armë zjarri në vilën e tij në Farkë, në 30 korrik 2020.

“Më datë 10.10.2020, rreth orës 04:05, në autostradën Tiranë-Durrës, në Maminas, është qëlluar me armë zjarri në drejtim të derës së jashtme të një objekti, në pronësi të shtetasit L.Z, duke shkaktuar vetëm dëme materiale.

Në ambientet e Policisë Durrës janë shoqëruar disa shtetas të dyshuar për këtë ngjarje. Grupi hetimor po punon për zbardhjen e e plotë të ngjarjes, identifikimin dhe kapjen autorit/ve”, njofton Policia.

KUSH ISHTE EUGERT LAZAJ dhe SI NDODHI NGJARJA:

Më 30 korrik 2020, biznesmeni 37-vjeçar, Eugert Lazaj, është gjetur pa jetë në vilën e tij private, brenda kompleksit “Rolling Hills” në Farkë.

Pranë tij u gjet një armë zjarri që sipas policisë ai e ka përdorur për t’i dhënë fund jetës. Megjithatë ende nuk dihet ekzaktësisht nëse është vetëvrarë apo është vrarë nga vrasës profesionistë.

Ndërkaq burime nga Drejtoria e Kufirit dhe Migracionit-Tiranë, kanë bërë publike për mediat disa dokumente sipas së cilave pronari i resort “Adorions Palace” në Maminas, Eugert Lazaj, kishte “llogari” ligjore-administrative e gjyqësore me policinë shqiptare.

Sipas informacionit zyrtar, biznesmeni ishte i lindur e rritur në Shqipëri, por Lazaj e ka lënë shtetësinë shqiptare qysh më 26.11.2004, në moshën 21-vjeçare, për të jetuar jashtë saj me shtetësi tjetër.

Sipas dosjes, pas shumë vitesh ai është rikthyer për të bërë biznes me resort turistik e për të jetuar përgjithnjë në Shqipëri, por Policia e Shtetit, nuk e ka pajisur me leje të përhershme, por vetëm më leje të përkohëshme “Tipi D/AE- Veprimtari ekonomike”.

Ndërkohë, pak ditë më parë u zbulua nga grupi i hetimit i ngritur nga Prokuroria se arma me të cilën ai ka vrarë veten është e njëjta me të cilën më 4 tetor të 2018-ës, komando Merviol Bilo ekzekutoi Fabiol Gaxhën, në ish-Bllok.p