Thirrje Koçiut: Të mos dërgojë policinë në mbështetje tëBashkim Ulajt

Banorët e fshatit Rrjoll, në Velipojë të Shkodër, kanë dalë sërish në protestë kundër ndërtimit të resortit “Blu Borgo”, projekt i lidhur me biznesmenin Bashkim Ulaj.

Protesta e së dielës është shoqëruar me tensione në zonën e kantierit, ku banorët dhe forcat e policisë janë përballur mes akuzash dhe kundërshtish të forta. Banorët shprehen të vendosur për të mos lejuar, sipas tyre, cenimin e pronave që pretendojnë se u përkasin.

Gjatë tubimit, ata i kanë bërë thirrje ministres së Brendshme, Albana Koçiu, që të mos dërgojë forca policie në mbështetje të projektit. Sipas tyre, prania e shtuar e efektivëve në terren po krijon klimë presioni.

Disa prej protestuesve kanë pretenduar se ka pasur shoqërime në polici dhe ndërhyrje të ashpra gjatë përplasjeve. Ata theksojnë se po mbrojnë tokën e tyre dhe kërkojnë drejtësi institucionale për çështjen e pronësisë.

Në deklaratat publike, janë përmendur edhe akuza politike, përfshirë ndaj zëvendëskryeministres dhe ministres së Infrastrukturës dhe Energjisë, Belinda Balluku, të cilën disa banorë e konsiderojnë përgjegjëse për situatën.

Nga ana tjetër, deri më tani nuk ka një reagim zyrtar nga përfaqësuesit e kompanisë apo nga institucionet qendrore lidhur me pretendimet e ngritura nga banorët.

Situata në Rrjoll mbetet e tensionuar, ndërsa pritet që çështja të marrë një zgjidhje institucionale mes palëve.