Tragjike! 49-vjeçari gjendet i varur në burgun e Reçit

Agron Llapushi, i dënuar me 24 vite e 4 muaj burg për vrasjen e bashkëshortes së tij, është gjetur pa shenja jete në ambientet e burgut.

Një ngjarje e rëndë është shënuar në burgun e Reçit, ku një i dënuar i ka dhënë fund jetës.

Shtetasi Agron Llapushi, 49 vjeç, është gjetur i varur me litar në ambientet e dusheve të institucionit të vuajtjes së dënimit.

Llapushi ishte duke vuajtur një dënim prej 24 vitesh e 4 muaj burg, pasi ishte shpallur fajtor për vrasjen e bashkëshortes së tij, Alketa Llapushi, ngjarje e ndodhur në vitin 2015.

Kishte shumë pak kontakte me familjarët

Sipas të dhënave të raportuara, 49-vjeçari kishte pasur shumë pak takime me familjarët apo të afërmit gjatë viteve të qëndrimit në burg.

Ai rezulton të ketë pasur vetëm dy takime gjatë gjithë kësaj periudhe. I pari është zhvilluar në vitin 2023, rreth tetë vite pas dënimit, ndërsa takimi i dytë është zhvilluar në vitin 2025.

Për pjesën tjetër të periudhës së vuajtjes së dënimit, Llapushi nuk është vizituar nga familjarë apo të afërm.

Ngjarja është tashmë objekt i verifikimeve përkatëse për të përcaktuar rrethanat e sakta të vdekjes.