Tragjike! Burri vret gruan dhe më pas veten në Roskovec

Një ngjarje e rëndë ka tronditur këtë të martë fshatin Kuman, në Roskovec, ku një çift i moshuar ka humbur jetën në rrethana tragjike brenda banesës së tyre.

Sipas të dhënave paraprake, rreth orës 14:30, shtetasi Shefit Rrapaj, rreth 80 vjeç, dyshohet se ka qëlluar me armë zjarri (pushkë) bashkëshorten e tij, Dashuri Rrapaj, rreth 75 vjeçe.

Pas krimit, i moshuari dyshohet se ka kryer vetëvrasje duke përdorur të njëjtën armë, duke i dhënë fund jetës në vendngjarje.

Menjëherë pas marrjes së njoftimit, në vend kanë mbërritur shërbimet e policisë dhe grupi hetimor, të cilët kanë nisur veprimet procedurale për dokumentimin e plotë të ngjarjes dhe zbardhjen e rrethanave që çuan në këtë akt ekstrem.

Paraprakisht dyshohet se krimi ka ndodhur brenda ambienteve të banesës së çiftit, ndërsa hetimet vijojnë për të kuptuar motivet dhe dinamikën e plotë të kësaj tragjedie që ka tronditur komunitetin lokal.