Trondit Ngjela: Berisha non-grata, për shkak të lidhjeve me Al Kaedën

Avokati Spartak Ngjela ka bërë deklarata të forta ndaj kreut të Partisë Demokratike, Sali Berisha, duke theksuar se shpallja e tij “non grata” nga Shtetet e Bashkuara lidhet, sipas tij, me marrëdhënie me forca islamike dhe anti-amerikane, përfshirë edhe Al Kaedën.

Gjatë një interviste në një televizion, Ngjela u shpreh se statusi “non grata” nuk mund t’i hiqet më Berishës, duke argumentuar se vendimi është i pakthyeshëm dhe i bazuar në doktrinën amerikane.

“Saliu është non grata në SHBA, ai që është non grata në Amerikë nuk të pranon i gjithë perëndimi. Është non grata atje me vendim të parlamentit jo presidentit dhe ata e kanë doktrinë non gratën. Nuk hiqet non grata sepse ka lidhje me Al Kaedën. Saliu ka pasur marrëdhënie me forcat islamike. Non grata i është vënë për këtë që ka marrëdhënie me forcat anti-amerikane e keni në motivin e non gratës këtë”, deklaroi Ngjela.

Më tej, ai theksoi se Berisha nuk gëzon mbështetje elektorale dhe se, sipas tij, qëndrimi në krye të PD-së lidhet vetëm me shqetësimet personale përballë drejtësisë.

“Berisha s’ka vota, pse rri? Detyron edhe partinën që të jetë pa vota, përplasen dy interesa interesi i partisë dhe ai individual, pse ndodh kjo. Ai është i shqetësuar për akuzën penale, ka nisur gjyqi. Nuk mund të jetë i qetë. Por ka një gjë, se nëse ai dënohet edhe me një muaj nuk pranohet që të jetë në politikë. Atëherë njeriu më i mërzitur është Rama. Po të mos jetë Saliu nuk fiton dot Rama. Duhet që të qëndrojë Saliu. Shikoni se si ka vepruar Rama kur mund të ndryshohet Saliu si kryetar i PD. Një kryetar që thërret protesta dhe si shkojnë njerëz duhet që të ik kryetari, po ai ka hall se është në proces penal”, tha Ngjela.

Duke komentuar edhe protestën e nismës “Shqipëria Bëhet” të Adriatik Lapajt, Ngjela u shpreh skeptik për peshën elektorale të partive të vogla, duke theksuar se skena politike shqiptare mbetet e dominuar nga dy forcat kryesore.

“Lapaj lodhet kot nuk ka vota, e kanë provuar, pse do të flasim kot. Partitë që marrin vota janë dy PD dhe PS. S’kanë vota, politika perëndimore është bipolare nuk ndryshon”, përfundoi ai.