Tymnaja e Ramës për qeverinë e re, gjithçka varet nga humori i tij

TIRANË – Publik.al

Qeveria e re e Edi Ramës ende nuk ka emra, por ka një datë: 11 shtatorin, kur është parashikuar mbledhja ku do të hidhen piketat për atë që Kryeministri e ka pagëzuar si “qeverisja për 2030”.

Në thelb, ky nuk është një lajm i papritur. E veçanta këtë herë qëndron tek mënyra se si Rama ka zgjedhur të luajë lojën e ankthit me vartësit e tij. Ndryshe nga herët e tjera, ai e ka shtyrë për disa ditë zbulimin e emrave që do të mbeten në kabinet dhe atyre që do të shkarkohen, duke mbajtur gjallë intrigën brenda Partisë Socialiste.

Tradicionalisht, Asambleja e PS ku shpalleshin ndryshimet e kabinetit zhvillohej në të dielën e fundit të gushtit. Por këtë vit, Rama ka vendosur ta zgjasë agoninë, duke lënë hapësirë për spekulime dhe emra të hedhur në qarkullim nga makina propagandistike e mazhorancës.

Ankthi i oborrit të Kryeministrit

Burime nga Kryeministria tregojnë se gjatë ditëve të fundit, Rama ka zhvilluar takime të shumta me bashkëpunëtorë e drejtues politikë, shumica e të cilëve mbajnë shpresën se do të jenë pjesë e kabinetit të ri. Por, si zakonisht, lista e vërtetë ndodhet vetëm në kokën e tij.

Në një parti që është shndërruar në një makineri propagande me publikun, por shurdh-memecë për zhvillimet e brendshme, kjo pritje ka prodhuar paradoksalisht “emocionin” e vetëm politik të ditëve të fundit.

Nga reforma tek spektakli i pushtetit

Rama po e përdor edhe këtë proces si një spektakël kontrolli, duke treguar se çdo karrierë politike në PS varet nga humori i tij i ditës. Deri në 11 shtator, publiku do të ushqehet me emra të mundshëm ministrash, por vetëm kryeministri di se kush do të përfundojë realisht në qeveri.