U lëndua duke riparuar automjetin në servis, humb jetën 23-vjeçari

Një ngjarje tragjike është regjistruar në Librazhd, ku një i ri 23-vjeçar ka humbur jetën pas një dëmtimi të dyshuar aksidental gjatë punës në një servis automjetesh.

Sipas të dhënave paraprake nga policia, i riu me inicialet L. D. është transportuar me urgjencë drejt spitalit të Librazhdit për të marrë ndihmë mjekësore, pasi dyshohet se është lënduar aksidentalisht teksa po riparonte automjetin e tij në servisin e një shtetasi me inicialet I. P.

Pavarësisht përpjekjeve të mjekëve, 23-vjeçari nuk ka mundur t’u mbijetojë plagëve të marra, duke ndërruar jetë në spital.

Menjëherë pas ngjarjes, në vendngjarje ka mbërritur grupi hetimor, i cili po kryen veprimet procedurale për të sqaruar plotësisht rrethanat e incidentit dhe për të dokumentuar ligjërisht çdo detaj që lidhet me rastin. Hetimet vijojnë për të përcaktuar shkaqet e sakta të ngjarjes dhe përgjegjësitë eventuale.

Ngjarja ka tronditur komunitetin lokal, ndërsa priten rezultatet e hetimeve për të hedhur dritë të plotë mbi incidentin e rëndë.