Vëllai i ish-drejtorit të policisë Artan Cuku emërohet nëndrejtor i BKH

Mentor Cuku është emëruar në postin e nëndrejtorit të Byrosë Kombëtare të Hetimit. Vendimi është marrë me urdhër të firmosur të hënën nga drejtori i BKH-së, Jon Keta.

Cuku ka një karrierë të gjatë në radhët e Policisë së Shtetit, ku ka shërbyer për vite me radhë në struktura të ndryshme hetimore. Dy vitet e fundit ai kaloi procesin e verifikimit dhe testimit për t’u bërë pjesë e BKH-së si hetues, duke u angazhuar në hetimin e disa dosjeve të rëndësishme që lidhen me krimin e organizuar.

Emri i tij lidhet gjithashtu me një nga ngjarjet më të rënda që kanë prekur policinë shqiptare në vitet e fundit. Mentor Cuku është vëllai i ish-drejtorit të policisë Artan Cuku, i cili u vra në një atentat në vitin 2017. Sipas hetimeve të autoriteteve, eliminimi i tij u porosit nga Bledar Jambelli, një personazh i njohur në botën e krimit.

Emërimi i Mentor Cukut në një nga postet drejtuese të BKH-së vjen në një moment kur kjo strukturë vijon të forcojë kapacitetet e saj në luftën kundër korrupsionit dhe krimit të organizuar.