Shefi i Durrësit Bujar Deliallisi ia thotë në sy: Po, unë jam!

Arrestimi i Aldo Avdylajt në Tiranë: RENEA kap anëtarin e grupit të Shijakut pas një operacioni të befasishëm

Një ndër emrat më të kërkuar të grupit kriminal të Shijakut, Aldo Avdylaj, është arrestuar nga forcat speciale të RENEA-s në një operacion të zhvilluar tre ditë më parë në zonën e Liqenit të Thatë, në Tiranë.

37-vjeçari, që akuzohet nga SPAK për një sërë ngjarjesh të rënda kriminale ndër vite, ishte një nga figurat më aktive të grupit të drejtuar nga xhaxhai i tij, Astrit Avdylaj, i njohur me nofkën “Niçja”.

Operacioni dhe identifikimi i vështirë

Sipas burimeve policore, RENEA ra në gjurmët e Avdylajt më 14 tetor, pas disa javësh ndjekjeje dhe informacionesh operative. Ai ndodhej i fshehur në një apartament në Tiranë dhe, në momentin e ndërhyrjes, nuk bëri rezistencë.

Në skedarët e Policisë së Shtetit ekzistonte vetëm një fotografi e vjetër e tij, ndërsa pamjet e reja të operacionit tregojnë një ndryshim të madh në fizikun dhe pamjen e jashtme të të arrestuarit. Në videon e publikuar nga ish-kryeministri Sali Berisha, Avdylaj shfaqet i qethur shumë shkurt, me peshë më të madhe trupore dhe dukshëm i transformuar.

Nëse nuk do të kishte qenë për identifikimin operativ të policisë, burime nga grupi hetimor thonë se “njohja vizuale” e tij do të ishte thuajse e pamundur.

Videoja e publikuar nga Berisha dhe prania e një drejtuesi policie

Sali Berisha deklaroi se videon ia ka dërguar një “qytetar dixhital”, ku dëgjohet emri i Bujar Deliallisit, ish-zëvendësdrejtor i Policisë së Durrësit, i cili mendohet se ka qenë prezent gjatë operacionit.

Në momentin e arrestimit, Aldo Avdylaj e njeh mes policëve të maskuar dhe i drejtohet me emër, ndërsa Deliallisi i përgjigjet duke e konfirmuar identitetin e tij. Kjo ka ngritur dyshime se drejtuesi i lartë i policisë ka qenë fizikisht në vendngjarje, ndoshta pa maskë.

Deliallisi i vetuar në detyrë

Sipas vendimit nr. 40, datë 29.08.2024, të Agjencisë së Mbikëqyrjes Policore, Bujar Deliallisi, në funksionin e Zëvendësdrejtorit të Policisë së Durrësit, ka kaluar me sukses të tre fazat e procesit të vettingut: pasurinë, figurën dhe aftësitë profesionale.

Megjithatë, prania e tij në një operacion të tillë ngre pikëpyetje për rolin dhe koordinimin e drejtuesve lokalë në veprimet operative të RENEA-s dhe DVP Durrës.

Vijon hetimi i SPAK

Burime pranë SPAK konfirmojnë se arrestimi i Aldo Avdylajt është pjesë e një hetimi më të gjerë që lidhet me aktivitetin e grupit të Shijakut, i përfshirë në trafikun e drogës, pastrimin e parave dhe dhunën e organizuar.

Hetimet për rrjetin e Avdylajve vijojnë në bashkëpunim me agjenci ndërkombëtare, ndërsa nuk përjashtohet që të ketë të tjera arrestime në ditët në vijim.