VIDEO/ Sulmohet fizikisht moderatori i njohur shqiptar

Moderatori i “Big Brother VIP Kosova”, Alaudin Hamiti, është përfshirë në një incident fizik që ka tërhequr menjëherë vëmendjen e publikut dhe mediave.

Pamjet e regjistruara nga kamerat e sigurisë së një biznesi dhe të publikuara nga Indeksonline tregojnë momentin kur Hamiti po ecte në një ambient të hapur, kur papritur përballet me një person që afrohet dhe e sulmon. Në video dëgjohet moderatori duke reaguar me tone të larta: “A je normal ti ej?”, menjëherë pas përplasjes.

Deri tani, rrethanat e plota të ngjarjes, identiteti i personit të përfshirë dhe motivet e mundshme mbeten të paqarta. Nuk ka ende një njoftim zyrtar nga autoritetet për detajet e incidentit, ndërsa publiku ka reaguar me shqetësim në rrjete sociale.

Pas përhapjes së videos dhe spekulimeve të shumta, Alaudin Hamiti ka reaguar për herë të parë gjatë spektaklit “Prime” të Big Brother VIP Kosova. Ai konfirmoi se incidenti ka ndodhur, por siguroi ndjekësit se gjendja e tij shëndetësore është e mirë.

“Dua të falënderoj të gjithë ata që më kanë shkruar sot. Po, ka ndodhur një incident, por unë jam mirë. Në momente të tilla, njeriu reagon për të mbrojtur veten dhe kjo është ajo që ka rëndësi. Sonte jemi këtu për spektakël, andaj le të fokusohemi te ajo që na bashkon të gjithëve,” u shpreh ai.

Moderatori nuk dha detaje shtesë mbi personin që e sulmoi apo arsyet që çuan në përplasje, duke lënë të kuptohet se situata është vënë nën kontroll. Pavarësisht ngjarjes, ai konfirmoi se do të vijojë normalisht angazhimin në mbrëmjen e radhës së spektaklit.

Reagimi i tij ka shërbyer për të qetësuar ndjekësit, ndërsa mbetet për t’u parë nëse do të ketë zhvillime të tjera apo sqarime zyrtare në vijim.