Viti i ri akademik nis me “policë” te dera/ Në auditorë vetëm studentët e vaksinuar dhe ata me test negativ

Pas më shumë se një viti onlinë, studentët rikthehen sot në auditore, ndërsa nisja e vitit akademik bëhet mes debateve për shkak të vaksinimit me detyrim.

Studentët do të përballen me disa rregulla për t’u ulur në bankat e auditoreve, të cilat mendohet se janë dhe më të ashpra krahasuar me kategoritë e tjera.

Konkretisht, sipas udhëzimit të qeverisë, studentët duhet të kenë marrë të dyja dozat e vaksinës për të ndjekur mësimet në auditorë.

Gjithashtu, një alternativë tjetër për studentët është dhe të paraqesin testin negativ PCR një herë në javë, ose vërtetimin që e kanë kaluar sëmundjen e Covid.

Bashkë me punonjësit e sigurisë është ngarkuar edhe struktura administrative të rakordojë hyrje-daljet në fakultete.

Numri i studentëve të vaksinuar është relativisht i ulët. Edhe pse nuk ka një shifër, të saktë, në kryeqytet janë vaksinuar afro 20% e studentëve, ndërsa në fakultetet e rretheve përqindja është shumë herë më e ulët.

Më së shumti, studentët kanë preferuar vaksinat e njohura nga Bashkimi Europian.