Vrasja në Elbasan, Karamuço zbulon rolin e lezhianit të arrestuar

Një banor i Lezhës është ndaluar nga policia në lidhje me ekzekutimin e biznesmenit Edmond Mehalla, i njohur edhe me emrin Edmond Hyka, në Elbasan. Naldo Gjini u kap nga forcat e rendit në Lezhë dhe më pas u transferua në Policinë e Elbasanit, pasi dyshohet se ka përdorur automjetin që u shfrytëzua nga autorët e ngjarjes.

Eksperti i kriminalistikës, Ervin Karamuço, tha se nga të dhënat paraprake, veprimi i autorëve duket i kryer me nxitim dhe jo si atentat i planifikuar në detaje.

Ai shtoi se hetimet po shqyrtojnë mundësinë që i ndaluari të ketë luajtur rolin e ndërmjetësit mes palëve të përfshira në konflikt.

“Sipas dyshimeve të para, ngjarja lidhet me pazare të prishura dhe tensione me një grup në zonën e Kurbinit. Mendohet se grupi kriminal i ka ngarkuar dikujt detyrën për të kryer atentatin pasi situata ka degraduar. Megjithatë, hetimet janë në zhvillim. Duhet analizuar edhe roli i personave të tjerë të përfshirë, të cilët mund të jenë nga kompanitë e viktimës ose nga Elbasani. Ende është herët për konkluzione,” u shpreh Karamuço për “ABC News”.