Vrasja në Paskuqan, apeli i fortë nga Policia e Tiranës

Një situatë alarmi është shpallur në zonën e Kamzës, pasi Policia e Tiranës është vënë në ndjekje të një personi të dyshuar për vrasjen e një 27-vjeçari. Autoritetet bëjnë me dije se në kërkim është shpallur shtetasi Sadik Llani, i cili konsiderohet me rrezikshmëri të lartë dhe dyshohet se është i armatosur.

Për kapjen e tij janë angazhuar strukturat më të specializuara të policisë, përfshirë forcat RENEA, njësitë operacionale dhe shërbimet e Drejtorisë Vendore të Policisë Tiranë. Kontrollet në terren vijojnë intensivisht, ndërsa zona mbetet nën monitorim të shtuar.

Policia u bën thirrje qytetarëve që të tregojnë kujdes maksimal dhe të mos ndërhyjnë në asnjë rast nëse përballen me të dyshuarin. Çdo informacion mbi vendndodhjen e tij duhet të raportohet menjëherë në numrat zyrtarë të policisë.

Në kuadër të këtij operacioni, autoritetet kanë vënë në dispozicion edhe një shpërblim prej 10 mijë eurosh për çdo informacion të saktë që do të çojë në lokalizimin dhe kapjen e tij, duke garantuar njëkohësisht anonimatin dhe sigurinë e plotë të bashkëpunëtorëve.

Ngjarja ka rritur ndjeshëm tensionin në zonë, ndërsa policia vijon operacionin për neutralizimin e autorit të dyshuar dhe rikthimin e sigurisë për qytetarët.

DREJTORIA VENDORE E POLICISË TIRANË

Apel për kujdes dhe bashkëpunim për kapjen e autorit të dyshuar të vrasjes së 27-vjeçarit në Kamëz.

Nisur nga rrezikshmëria e lartë e autorit të dyshuar për vrasjen e shtetasit A. B., 27 vjeç, Drejtoria Vendore e Policisë Tiranë apelon ndaj qytetarëve të Kamzës dhe zonave përreth që të tregojnë kujdes të shtuar, pasi autori i dyshuar, shtetasi Sadik Llani, dyshohet se është i armatosur dhe konsiderohet person me rrezikshmëri të lartë shoqërore.

Për lokalizimin dhe kapjen e tij janë angazhuar Forca Kombëtare e Sigurisë “RENEA”, strukturat operacionale të Policisë së Shtetit dhe shërbimet e Drejtorisë Vendore të Policisë Tiranë, të cilat po vijojnë kontrollet intensive në terren.

Drejtoria Vendore e Policisë Tiranë kërkon bashkëpunimin e qytetarëve që, nëse konstatojnë këtë shtetas ose disponojnë informacion mbi vendndodhjen e tij, të mos ndërhyjnë në asnjë mënyrë, por të njoftojnë menjëherë Policinë në numrin 069 41 05 735 ose në numrin pa pagesë 112.

Drejtoria Vendore e Policisë Tiranë vë në dispozicion një shpërblim prej 10 000 eurosh për informacionin e saktë që do të çojë në lokalizimin dhe kapjen e autorit të dyshuar.

Policia e Tiranës garanton ruajtjen e plotë të konfidencialitetit për çdo informacion të dhënë nga qytetarët.