Arrestohet autori i vrasjes së 81-vjeçarit Xhemal Meta

Policia ka arrestuar këtë të mërkurë 64-vjeçarin Isuf Hasa, i cili akuzohet për vrasjen e fqinjit të tij Xhemal Meta më 13 janar në fshatin Shëngjin i Vogël, Tiranë.

Sipas hetimeve, Hasa shkoi në banesën e Metës, e goditi me çekiç në kokë dhe i vodhi një shumë parash që ai mbante me vete. Viktima u gjet i pajetë në oborrin e banesës së tij, dhe ekspertiza mjekësore konfirmoi se vdekja ishte shkaktuar nga goditje me sende të forta.

Pas 48 orësh hetime intensive, Policia identifikoi dhe arrestoi autorin, ndërsa gjatë kontrolleve u sekuestruan një çekiç dhe 200,000 lekë të rinj, të dyshuara si prova të krimit. Isuf Hasa akuzohet për veprën penale “Vrasja me paramendim”.