Akuza nga korrupsioni, deri te pastrim parash e mosdeklarim pasurie

Është caktuar data për nisjen e procesit gjyqësor ndaj ish-presidentit Ilir Meta, ish-deputetes Monika Kryemadhi dhe tre personave të tjerë të pandehur, në një nga çështjet më të bujshme të drejtësisë në vend.

Gjykata e Posaçme kundër Korrupsionit dhe Krimit të Organizuar ka vendosur që seanca e parë e gjykimit të zhvillohet më 27 prill, në orën 11:00. Sipas organit të akuzës, Strukturës së Posaçme kundër Korrupsionit dhe Krimit të Organizuar, të pandehurit përballen me akuza të rënda që përfshijnë korrupsionin, pastrimin e parave dhe mosdeklarimin e pasurisë.

Gjatë seancës paraprake, të akuzuarit kanë hedhur poshtë të gjitha pretendimet, duke i cilësuar hetimet si të motivuara politikisht. Trupa gjykuese, e përbërë nga gjyqtarët Etleva Deda, Atalanta Zeqiraj dhe Besmir Stroka, ka vendosur kalimin e çështjes në gjykim dhe përcaktimin e datës së parë të shqyrtimit në themel.

Sipas dosjes hetimore, ndaj Metës rëndojnë tre akuza penale që lidhen me çështjen CEZ/DIA dhe lobimin në Shtetet e Bashkuara, të komunikuara më 4 gusht 2025. Ai akuzohet për fshehje pasurie, pastrim parash dhe korrupsion. Aktualisht, ish-presidenti ndodhet në paraburgim që prej tetorit 2024.

Ndërkohë, Kryemadhi është nën masën e sigurisë “detyrim paraqitjeje”. Dosja përfshin gjithashtu hetime ndaj Pirro Xhixho dhe Ema Çokut, të cilët, së bashku me të pandehurit e tjerë, akuzohen për vepra si korrupsioni pasiv, pastrimi i parave dhe mosdeklarimi i pasurive.

Ky proces pritet të jetë një test i rëndësishëm për drejtësinë shqiptare, duke qenë se përfshin figura të nivelit të lartë dhe akuza që prekin çështje të ndjeshme të transparencës dhe integritetit publik.