Zgjedhja e anëtarëve të KPP-së, kandidatët shfaqin platformat e tyre

Kandidatët për anëtarë të Komisionit të Prokurimit Publik (KPP) kanë paraqitur këtë të mërkurë në Komisionin e Ligjeve platformat dhe vizionet e tyre për funksionimin e institucionit, duke vënë theksin te transparenca, shpejtësia dhe cilësia e vendimmarrjes.

Gjatë seancës dëgjimore, secili prej kandidatëve prezantoi prioritetet kryesore dhe eksperiencën profesionale që synon të sjellë në KPP, një institucion kyç për garantimin e ligjshmërisë në prokurimet publike.

Fiorent Zguro theksoi se fokusi i tij mbetet te zbatimi rigoroz i ligjit dhe standardeve në fuqi:
“Fokusi është në ligjshmëri dhe në legjislacionin e aplikueshëm në Shqipëri, duke iu përmbajtur parimeve të paanshmërisë në shqyrtimin e ankesave, qëndrueshmërisë, transparencës dhe forcimit të besimit të publikut.”

Edvin Simo u ndal te problematika e vonesave në shqyrtimin e ankesave:
“Një nga çështjet që kërkon ndërhyrje është vonesa në trajtimin e ankesave. Duhet të analizohen arsyet dhe kjo do të jetë në fokusin tim.”

Enkeleon Topulli vuri në dukje eksperiencën e tij të hershme në prokurimet publike dhe kontributin në aspektin financiar:
“Kam njohuri të thelluara të ligjit të prokurimeve, që nga fazat e para të prokurimeve elektronike. Përvoja ime financiare ndihmon në ndërthurjen e elementëve ekonomikë dhe në marrjen e vendimeve sa më pranë realitetit, duke garantuar përdorimin eficient të fondeve.”

Lulzim Mata theksoi përkushtimin e tij shumëvjeçar në këtë fushë:
“Kam një jetë që punoj në prokurime. Profesionalizmi dhe ndershmëria kanë qenë gjithmonë udhërrëfyesit e mi dhe jam i bindur se do ta kryej këtë detyrë në mënyrën më të mirë.”

Ergys Streza u ndal te rëndësia strategjike e KPP-së përtej shqyrtimit të ankesave:
“Gjatë 10 viteve të fundit i jam përkushtuar sistemit të prokurimeve. KPP ka një mision më të gjerë se shqyrtimi i ankesave, pasi lidhet me besimin e qytetarëve dhe operatorëve ekonomikë. Angazhimi im do të jetë në rritjen e cilësisë së vendimmarrjes, duke përdorur edhe analizën e të dhënave dhe dixhitalizimin si mbështetje për gjykimin juridik. Transparenca mbetet themeli i besimit publik, ndërsa përgatitja për standardet e BE-së është prioritet.”

Donika Daci theksoi rëndësinë e qëndrueshmërisë institucionale:
“Kandidatura ime synon të kontribuojë në forcimin e qëndrueshmërisë së KPP-së dhe të vendimmarrjes së tij. Eksperienca ime në menaxhim dhe pjesëmarrje në procedurat e prokurimit, si dhe trajnimet në ASPA, do të shërbejnë në këtë drejtim.”

Julian Dhima u shpreh shkurtimisht:
“I përmbush kushtet për të qenë anëtar i KPP-së.”

Najada Merolli e konsideroi kandidimin si një vlerësim profesional:
“Nxitja nga stafi dhe ish-stafi im për të kandiduar është një vlerësim i rëndësishëm. Për një prokurues, të jesh pjesë e KPP-së është kulmi i karrierës. Do të ofroj një oponencë të fortë dhe do të jem e paanshme në vendimmarrje.”

Florian Sahatçiu e sheh këtë hap si një avancim profesional:
“Ka ardhur momenti për një zhvillim cilësor në karrierën time. Nëse zgjidhem, do të punoj për të rritur më tej cilësinë e vendimmarrjes së KPP-së.”

Erald Mihali vuri theksin te efikasiteti:
“Kjo është një sfidë për mua. Transparenca, shpejtësia dhe cilësia janë thelbësore, pasi çdo vonesë në vendimmarrje ndikon drejtpërdrejt në zbatimin e prokurimeve publike.”

Bledar Cengu evidentoi tre shtylla kryesore të profilit të tij:
“Plotësoj tre kritere themelore: njohjen e legjislacionit të vjetër dhe të ri, përvojën praktike dhe vendosmërinë në vendimmarrje.”

Nertil Kanina theksoi përvojën dhe synimet për rritjen e eficencës:
“Është hera e dytë që kandidoj. Përvoja më ka dhënë shtysë për të konkurruar sërish. Synoj rritjen e eficencës dhe qëndrueshmërisë së KPP-së, duke garantuar vendimmarrje të drejtë dhe në kohë.”

Xhovan Gjini u shpreh:
“Eksperienca e këtyre viteve më ka bindur se mund të jem një vlerë e shtuar për KPP-në.”

Hipokrat Biba theksoi motivimin profesional:
“Dëshira për rritje profesionale më shtyu të kandidoj. Respektimi i ligjit, vendimmarrja në kohë dhe transparenca do të jenë parimet e mia udhëheqëse.”

Lorena Beqiri vjen nga sektori privat:
“Motivimi im është tërësisht profesional. Nuk kam punuar në administratën publike, por jam njohur me prokurimet që prej vitit 2010.”

Endri Dafa vuri në dukje përvojën konkrete me ankimimet:
“Plotësoj të gjitha kriteret ligjore dhe kam mbi tre vite eksperiencë në sektorin privat, me më shumë se 100 ankimime pranë KPP-së. Vendimmarrja ime do të bazohet në paanshmëri, shpejtësi dhe eficencë, duke garantuar akses për publikun.”

Hektor Muçaj e konsideron KPP-në si një mundësi për kontribut maksimal:
“Arsyet e kandidimit janë profesionale. Në KPP mund të japësh maksimumin dhe vendimet duhet të jenë sa më të thjeshta dhe të kuptueshme për të gjithë.”