Zgjedhja e kreut të ri të SPAK-ut, nën “lupën” e SHBA-së

Përfaqësuesit amerikanë, pjesë e misionit të asistencës për institucionet e drejtësisë, u shfaqën sot në mbledhjen e Këshillit të Lartë të Prokurorisë (KLP), duke shënuar një rikthim të dukshëm në proceset e monitorimit, një prani që kohët e fundit ishte vënë në dyshim.

Të martën, KLP u mblodh për të votuar propozimin e SPAK për kreun e ri të Byrosë Kombëtare të Hetimit (BKH), ku SPAK ka propozuar Jon Ketën si drejtues të ri. Në sallë ishin të pranishëm përfaqësues amerikanë dhe të Bashkimit Evropian, të cilët ndoqën nga afër ecurinë e mbledhjes dhe debatet procedurale mbi mënyrën e paraqitjes së relacionit të SPAK.

Roli i amerikanëve dhe mbështetja ndërkombëtare

Përfaqësuesit amerikanë nuk marrin vendime dhe nuk ndërhyjnë në procesin e votimit; roli i tyre është vetëm monitorues dhe mbështetës teknik.

Ata do të jenë të pranishëm edhe më 11 dhjetor 2025 gjatë seancave dëgjimore dhe testimit të katër kandidatëve për drejtimin e SPAK:

• Adnan Xholi

• Doloreza Musabelliu

• Elvin Gokaj

• Klodian Braho

Kujtesë: Si u zgjodh Altin Dumani?

Procesi i zgjedhjes së kreut të SPAK ka qenë gjithmonë objekt interesimi të madh. Në dhjetor 2022, Altin Dumani u zgjodh në krye të SPAK pas një procesi transparent, i monitoruar nga partnerët ndërkombëtarë, përfshirë përfaqësues amerikanë. Edhe atëherë, roli i tyre ishte monitorues dhe mbështetës.