“Zgjedhjet e fundit kanë dëmtuar më tej shanset e Shqipërisë”- Portali i njohur i Brukselit: Votimet vetëm sa konfirmojnë…

Zgjedhjet e fundit lokale në Shqipëri kanë dëmtuar më tej shanset që vendi të përparojë në rrugën e saj drejt anëtarësimit në BE, shkruan portali i njohur i Brukselit, Euractiv.

Që nga shkurti, skena politike e Shqipërisë shpresëdhënëse të BE-së ka qenë në krizë të thellë dhe është prishur nga protestat. Të dielën (30 qershor), qeveria vendosi të mbajë zgjedhjet lokale edhe pse opozita i bojkotoi ato.

Këshilli i BE pritet të marrë një vendim nëse do të hapë bisedimet e pranimit me Shqipërinë në tetor në përputhje me rekomandimin e Komisionit. Por ngjarje si votimet e së dielës vetëm përforcojnë bindjen e disa shteteve evropiane rreth paaftësisë së Shqipërisë për të përmbushur kriteret e pranimit.

Ambasadorja Audrey Glover, kreu i misionit vëzhgues të zgjedhjeve të ODIHR thotë se “mungesa e partive më të mëdha të opozitës bënë që zgjedhjet të jenë të kufizuara në mënyrë të konsiderueshme për votuesit”.

Misioni i ODIHR ka dy muaj për të mbledhur prova për mashtrim zgjedhor ose shkelje ligjore.

Peizazhi politik në Shqipëri karakterizohet nga një përçarje më e thellë midis Partisë Socialiste (PS) qeverisëse të kryeministrit Edi Rama dhe Partisë Demokratike të opozitës (PD) të Lulzim Basha së bashku me Lëvizjen Sociale për Integrim (LSI).

Në shkurt, PD dhe LSI u tërhoqën nga parlamenti dhe njoftuan se nuk do të kthehen derisa të dorëhiqet Rama. Kryeministri hodhi poshtë kërkesat e tyre dhe PD-ja organizoi disa protesta, që u shoqëruan nga dhuna e rastësishme në rrugë dhe vandalizmi.

Dita e zgjedhjeve ishte në përgjithësi paqësore, por pjesëmarrja kombëtare ishte e vogël, 21.6%. Si shumë herë në të kaluarën, BE bëri thirrje për dialog.

Rama fajësoi opozitën për mosgatishmërinë e saj për të filluar dialogun,  pavarësisht nga kërkesa e tij.

Kreu i opozitës, Lulzim Basha, akuzoi kryeministrin për korrupsion dhe lidhje me krimin e organizuar. Ai i përshkroi zgjedhjen si “jo kushtetuese” dhe “një parodi tragjike të demokracisë. Është një votim me një parti, i kontrolluar nga një parti. Për ne, ky votim është zero”, tha ai.

Presidenti Ilir Meta u bëri thirrje udhëheqësve të “zbusin tonet dhe të fillojnë dialogun”.

/Me shkurtime nga Euractiv/