Zgjedhjet lokale në Kosovë, përfundon numërimi në disa komuna

Kosova ka përmbyllur procesin e votimit për balotazhin e zgjedhjeve lokale në 18 komuna, ndërsa Komisioni Qendror i Zgjedhjeve (KQZ) ka nisur menjëherë numërimin dhe publikimin e rezultateve paraprake.

Kryetari i KQZ-së, Kreshnik Radoniqi, tha se procesi është zhvilluar qetë, pa incidente që mund të vinin në dyshim integritetin e votimit.

“Nga raportimet që kemi pranuar gjatë ditës, vlerësojmë se votimi u zhvillua në mënyrë të rregullt dhe të qetë”, deklaroi Radoniqi, duke shtuar se rezultatet e para pritet të publikohen rreth orës 21:00.

Në balotazh shkuan komunat: Prishtina, Prizreni, Peja, Juniku, Dragashi, Gjakova, Kaçaniku, Fushë Kosova, Mitrovica e Jugut, Rahoveci, Suhareka, Gjilani, Vitia, Vushtrria, Obiliqi, Klina, Mamusha dhe Kllokoti.

LVV kryeson në Gjilan e Kaçanik

Në Gjilan, kandidati i Vetëvendosjes Alban Hyseni kryeson bindshëm me 59.83% të votave, kundrejt Arbër Ismajlit të LDK-së që ka 40.17%. Diferenca mes tyre është mbi 3 mijë vota.

Në Kaçanik, gjithashtu, Vetëvendosje prin me Jeton Rakën që ka marrë 50.41%, përballë Sabedin Vishit të PDK-së.

Gara më e ngushtë në Mitrovicë të Jugut

Një përballje e fortë po zhvillohet në Mitrovicë të Jugut, ku Faton Peci i LVV-së ka 54.17% të votave, ndërsa Arian Tahiri i PDK-së ndjek me 45.83%. Diferenca mes tyre është vetëm 688 vota.

PDK ruan Prizrenin, Totaj drejt një mandati të dytë

Në Prizren, kandidati i PDK-së Shaqir Totaj pritet të fitojë edhe një mandat, pasi me 75% të votave të numëruara, ai ka 54.97% të votave kundrejt Artan Abrashit të Vetëvendosjes.

LDK me avantazh në Prishtinë, Pejë dhe Dragash

Në Prishtinë, Përparim Rama i LDK-së mban epërsinë me 51.15%, ndërsa rivali i tij nga LVV, Hajrulla Çeku, ka 48.85%. Gara mbetet shumë e ngushtë.

Në Pejë, Gazmend Muhaxhiri i LDK-së duket se ka siguruar një tjetër mandat, me 61.4% të votave të numëruara.
Në Dragash, Bexhet Xheladini i LDK-së ka 57.85%, përballë Shaban Shabanit të PDK-së që ka 42.15%.

AAK fiton në disa komuna

Aleanca për Ardhmërinë e Kosovës ka siguruar disa fitore të rëndësishme.
Në Gjakovë, Ardian Gjini ka shpallur fitoren me 62.32% të votave, ndërsa në Suharekë, Bali Muharremaj kryeson me 55.95%.
Në Klinë, Zenun Elezaj i AAK-së ka marrë 58.69%, ndërsa në Rahovec, Smajl Latifi prin me 58.53%.

Lista Serbe ruan bastionet në veri

Në komunën me shumicë serbe Kllokot, kandidati Bozhidar Dejanoviq nga Lista Serbe ka fituar pothuajse 90% të votave, duke vulosur një fitore të pastër.
Kryetari i partisë, Zllatan Ellek, e ka cilësuar rezultatin si “fitore historike”, pasi Lista Serbe ka ruajtur kontrollin në të dhjetë komunat me shumicë serbe.