Zjarr në Belsh, flakët kërcënojnë banesat

Një zjarr i përmasave të mëdha ka përfshirë fshatin Fierzë në bashkinë e Belshit, duke shkaktuar dëme të konsiderueshme në sipërfaqe të gjera me pemëtore, ullishte dhe shkurre. Flakët po përhapen me intensitet, ndërsa situata mbetet alarmante për banorët e zonës.

Sipas dëshmive nga terreni, rreziku për përfshirjen e banesave është real nëse ndërhyrja nuk rezulton e menjëhershme dhe efektive. Era e fortë po ndihmon përhapjen e zjarrit, duke e bërë më të vështirë izolimin e vatrave aktive.

Në vendngjarje ndodhen forcat zjarrfikëse të Belshit, të cilat po punojnë për neutralizimin e flakëve, ndërsa është kërkuar mbështetje edhe nga bashki të tjera për përforcim të operacionit. Ndryshe nga qyteti i Elbasanit që është përballur me kushte të paqëndrueshme atmosferike, në zonën e Belshit mungesa e reshjeve po e vështirëson ndjeshëm shuarjen e zjarrit.

Autoritetet u bëjnë thirrje banorëve të tregojnë kujdes maksimal dhe të bashkëpunojnë me ekipet në terren, ndërsa operacioni për vënien nën kontroll të flakëve vijon.